ලෝක පූජිත බ්‍රසීලය ලෝක කුසලානයෙන් ඉවත් කරමින් නෝර්වේ නේමාර්ගේ අවසන් සිහිනයද බොඳ කරයි

2026 ලෝක කුසලාන පාපන්දු තරගාවලියේ අවසන් 16 දෙනාගේ වටයේදී ප්‍රබල බ්‍රසීලය 2-1ක් ලෙස පරාජය කළ නෝර්වේ කණ්ඩායම ඉතිහාසයේ පළමු වරට ලෝක කුසලාන අර්ධ අවසන් අට දෙනාගේ වටයට සුදුසුකම් ලබාගත්තේය.

පාපන්දු ලෝක කුසලාන පස් වතාවක් ජයගත්, ලොව විශිෂ්ටතම ක්‍රීඩකයන් රැසක් බිහිකළ කණ්ඩායමක් ලෙස සැලකෙන බ්‍රසීලයට, සුපිරි ක්‍රීඩක නේමාර් සමඟ ලෝක කුසලානයක් දිනා ගැනීමේ සිහිනය මෙවරත්  බිඳ වැටුණි.

කේප් වර්ඩ් සමග කරට කර සටනින් ලෝකශුර ආර්ජන්ටිනාව සුපිරි 16 අතරට

ඒ අනුව, තවත් ලෝක කුසලාන ශූරතාවක් පිළිබඳ බලාපොරොත්තුව රැඳවීමට ඔවුන්ට තවත් සිව් වසරක් බලා සිටීමට සිදුව තිබේ. තරගයේ වීරයා වූ නෝර්වේ නායක එර්ලින් හාලන්ඩ් අවසන් මිනිත්තු කිහිපය තුළ විශිෂ්ට ගෝල දෙකක් වාර්තා කරමින් පස් වතාවක් ලෝක ශූරයන් වූ බ්‍රසීලයට දැඩි ප්‍රහාරයක් එල්ල කළේය.

79 වැනි මිනිත්තුවේදී ගේබ්‍රියෙල්ට ඉහළින් පැන හිසෙන් එල්ල කළ ප්‍රහාරය ගෝලයක් බවට පත් කළ හාලන්ඩ්, ඉන් අනතුරුව දුර සිට එල්ල කළ පහත් ප්‍රහාරයකින් දෙවැනි ගෝලයද වාර්තා කරමින් නෝර්වේ ජයග්‍රහණය තහවුරු කළේය.

තරගයේ අතිරේක කාලයේදී ආදේශක ක්‍රීඩකයකු ලෙස පිටියට පිවිසි නේමාර් දඬුවම් පහරක් සාර්ථක කරමින් බ්‍රසීලයට එකම ගෝලය ලබාදුන්නද, එය පරාජය වළක්වා ගැනීමට ප්‍රමාණවත් නොවීය.

බ්‍රසීලයට තරගයේ මුල් භාගයේදීම හිමි වූ දඬුවම් පහරක් බෲනෝ ගිමාරායිස්ට සාර්ථක කරගත නොහැකි වූ අතර, එය නෝර්වේ ගෝල රකින්නා වූ ඔර්ජන් නයිලන්ඩ් විශිෂ්ට ලෙස වළක්වා ගත්තේය.

තරගය පුරාම නයිලන්ඩ් දැක්වූ දක්ෂතා නෝර්වේ ජයග්‍රහණයේ ප්‍රධාන සාධකයක් විය. මෙම ගෝල දෙකත් සමඟ හාලන්ඩ් මෙවර ලෝක කුසලානයේ සිය ගෝල සංඛ්‍යාව 7 දක්වා ඉහළ දමා ගෝල්ඩන් බූට් සම්මානය සඳහා ලයනල් මෙසී සහ කිලියන් එම්බාපේ සමඟ සම තත්ත්වයට පත්විය.

එමෙන්ම නෝර්වේ වෙනුවෙන් අඛණ්ඩ ජාත්‍යන්තර තරග 14කදී ගෝල රැස් කිරීමේ ඔහුගේ විශිෂ්ට වාර්තාවද තවදුරටත් දිගු විය. අනෙක් පසින්, පුහුණුකරු කාර්ලෝ අන්චෙලොට්ටිගේ නායකත්වය යටතේ තරග වැදුණු බ්‍රසීලයට තවත් වරක් ලෝක කුසලාන තරගාවලියෙන් වේලාසනින්ම ඉවත් වීමට සිදුවිය.

බෲනෝ ගිමාරායිස්ගේ අසාර්ථක දඬුවම් පහර ඇතුළු අවස්ථා රැසක් අපතේ හැරීම බ්‍රසීලයේ පරාජයට බලපෑ ප්‍රධාන හේතුවක් විය.

මේ අතර, නෝර්වේ කණ්ඩායම අර්ධ අවසන් අට දෙනාගේ වටයේදී එංගලන්තය සහ මෙක්සිකෝව අතර තරගයේ ජයග්‍රාහකයා සමඟ තරග වැදීමට නියමිතය.

හාලන්ඩ්ගේ වත්මන් විශිෂ්ට දස්කම් හමුවේ නෝර්වේ කණ්ඩායමට මෙවර ලෝක කුසලානයේ තවත් දුර ගමනක් යා හැකි බවට විශ්වාසය ඉහළ ගොස් තිබේ.

මේ දවස්වල ලෝකෙම පිස්සු වට්ටපු FIFA ලෝක කුසලානයේ පුන පුනා බලා සිටි පුවත මෙන්න - 16 දෙනාගේ වටයේ කාලසටහන