“අම්මාගේ නම කමිසයේ ගසාගෙන පිටියට ආ මිලර්ගෙන් සුපිරි ශතකයක්” - පියයුරු පිළිකා රෝගය පිළිබඳ දැනුවත් කිරීමේ සංවේදී තරගයක් [VIDEO]

ඩේවිඩ් මිලර්ගේ වාර්තාගත ඉනිම සහ ටෙම්බා බවුමාගේ ශතකය හේතුවෙන් ඕස්ට්‍රේලියාවට එරෙහි දෙවැනි එක්දින තරගයෙන් ලකුණු 32ක ජයක් වාර්තා කිරීමට දකුණු අප්‍රිකාව සමත්ව තිබේ.

ජොහැන්නස්බර්ග්හි වොන්ඩරර්ස් ක්‍රීඩාංගණයේ පැවති තරගයේදී පළමුව පන්දුවට පහරදුන් දකුණු අප්‍රිකාව පන්දුවාර 50 අවසානයේ කඩුලු 9ක් දැවී ලකුණු 365ක් රැස් කළේය. එහිදී ඩේවිඩ් මිලර් පන්දු 93කින් ලකුණු 142ක් රැස් කරමින් සිය එක්දින ජාත්‍යන්තර ක්‍රිකට් දිවියේ ඉහළම ලකුණු සංඛ්‍යාව වාර්තා කළේය.

ටෙම්බා බවුමා පන්දු 112කින් ලකුණු 103ක් රැස් කළේය. මෙම තරගය දකුණු අප්‍රිකාවේ වාර්ෂික පියයුරු පිළිකා පිළිබඳ දැනුවත් කිරීමේ දිනයට සමගාමීව පැවැත්වුණු අතර, ක්‍රීඩකයින් තම කමිසවල සුපුරුදු නම් වෙනුවට තම මව්වරුන්ගේ නම් සටහන් කරගෙන ක්‍රීඩා කළහ.

මිලර්ගේ කමිසයේ ඔහුගේ මව වන ජෙනීගේ නම සටහන් කර තිබූ අතර, ඇය පියයුරු පිළිකාවෙන් දිවි ගලවාගත් තැනැත්තියකි. මිලර් ශතකය වාර්තා කිරීමෙන් අනතුරුව තම මව දෙසට ඇඟිල්ල දිගු කර ඇයට හාදුවක් ලබාදෙන අයුරින් සැමරුමක නිරත විය.

මිලර් සහ බවුමාගෙන් තීරණාත්මක සබඳතාවක්

කාසියේ වාසිය දිනාගත් ඕස්ට්‍රේලියානු නායක මිචෙල් මාෂ් පළමුව පන්දු යැවීමට තීරණය කළ අතර, ආරම්භයේදීම ඒඩන් මාක්‍රම් දැවී ගියේය. ක්වින්ටන් ඩි කොක් හේසල්වුඩ්ට එරෙහිව හයේ පහර දෙකක් එල්ල කළද, අනතුරුව දැවී ගිය අතර දකුණු අප්‍රිකාව ලකුණු 36කට කඩුලු 2ක් ලෙස අසීරු තත්ත්වයකට පත්විය.

එතැන් සිට බවුමා සහ මිලර් ඉනිම ගොඩනැගූ අතර, සිව්වැනි කඩුල්ල වෙනුවෙන් ඔවුන් දෙදෙනා ලකුණු 156ක සබඳතාවක් ගොඩනැගූහ. බවුමා පන්දුවක් වැදීම හේතුවෙන් දකුණු අතේ බාහුවට ආබාධයකට ලක්ව ප්‍රතිකාර ලබාගත්තද, නැවත පිටියට පැමිණ සිය ශතකය සම්පූර්ණ කළේය.

ඔහු පසුව ලකුණු 103කට දැවී ගියේය. මිලර් පන්දු 73කින් ශතකය සම්පූර්ණ කළ අතර, අවසන් පන්දු 20 තුළ තවත් ලකුණු 42ක් එක් කළේය. එය ඔහුගේ එක්දින ජාත්‍යන්තර දිවියේ අටවැනි ශතකයයි.

මේ අනුව අංක 5 හෝ ඊට පහළ ස්ථානයක සිට රැස් කළ වැඩිම එක්දින ශතක සංඛ්‍යාව සම්බන්ධයෙන් මිලර් ජොස් බට්ලර් සමඟ සම තත්ත්වයට පත්විය. අවසන් පන්දුවාර 10 තුළ ලකුණු 100ක් රැස් කළ දකුණු අප්‍රිකාව ලකුණු 365ක් දක්වා ඉනිම ගෙන ගියේය.

ශ්‍රී ලංකාවට තවත් තරගාවලි පරාජයක් - එංගලන්තය එක්දින තරගාවලිය ජයගනී [HILIGHT

එඩ්වර්ඩ්ස්ගෙන් කඩුලු 5ක්

ඕස්ට්‍රේලියාව වෙනුවෙන් ජැක් එඩ්වර්ඩ්ස් සිය දෙවැනි එක්දින තරගයේදීම කඩුලු 5ක් දවාගනිමින් පන්දුවෙන් කැපී පෙනෙන දස්කම් දැක්වීය.

ඔහු ලකුණු 67කට කඩුලු 5ක් දවාගත් අතර, බවුමා, මැතිව් බ්‍රීට්ස්කේ, ට්‍රිස්ටන් ස්ටබ්ස්, මාර්කෝ යැන්සන් සහ මිලර් ඔහුගේ ගොදුරු බවට පත්වූහ. මේ අතර නේතන් එලිස් පන්දුවාර හතරක් යැවීමෙන් අනතුරුව පැත්තේ මාංශපේශි ආබාධයකට ලක්ව පිටියෙන් ඉවත් වීම ඕස්ට්‍රේලියාවට අවාසියක් විය.

ඕස්ට්‍රේලියාවේ උත්සාහය ලකුණු 32කින් නතර වෙයි

ලකුණු 366ක ඉලක්කයක් හඹා ගිය ඕස්ට්‍රේලියාවට ආරම්භයේදී සාර්ථක ප්‍රතිචාරයක් ලබාදීමට හැකි විය. මිචෙල් මාෂ් සහ ට්‍රැවිස් හෙඩ් පළමු කඩුල්ල වෙනුවෙන් ලකුණු 130ක සබඳතාවක් ගොඩනැගූහ.

මාෂ් පන්දු 53කින් ලකුණු 84ක් රැස් කළ අතර, හෙඩ් පන්දු 76කින් ලකුණු 84ක් ලබා ගත්තේය. කෙසේ වෙතත්, ඔවුන් දෙදෙනා දැවී යාමෙන් පසු දකුණු අප්‍රිකානු දඟ පන්දු යවන්නන් තරගයේ පාලනය නැවත ලබාගත්හ.

කේෂව් මහරාජ් ඇලෙක්ස් කේරි සහ මැට් රෙන්ෂෝ දවාගත් අතර, ඕස්ට්‍රේලියාව පන්දුවාර 40ක් අවසානයේ කඩුලු 6කට ලකුණු 251ක් ලබා සිටියේය.

ඒ වනවිට ජයග්‍රහණය සඳහා ඔවුන්ට පන්දු 63කින් තවත් ලකුණු 115ක් අවශ්‍ය විය. සේවියර් බාර්ට්ලට් වේගවත් අර්ධ ශතකයක් වාර්තා කරමින් ඕස්ට්‍රේලියාවේ බලාපොරොත්තු ඉහළ නැංවූ අතර, ඔහු හයේ පහර 5ක් එල්ල කළේය.

එහෙත් අවසන් අදියරේදී මාර්කෝ යැන්සන් සහ ලිසාඩ් විලියම්ස් ඕස්ට්‍රේලියානු ඉනිමට තීරණාත්මක පහර එල්ල කළහ. අවසානයේ ඕස්ට්‍රේලියාව පන්දුවාර 50 අවසන් වීමට එක් පන්දුවක් ඉතිරිව තිබියදී ලකුණු 333කට සියලු දෙනා දැවී ගියේය.

ඒ අනුව දකුණු අප්‍රිකාව තරගය ලකුණු 32කින් ජයගත් අතර, තරග තුනකින් සමන්විත එක්දින තරගාවලිය තරග 2-0ක් ලෙස දැනටමත් ජයගෙන තිබේ.

මෙය ඕස්ට්‍රේලියාවට එරෙහිව දකුණු අප්‍රිකාව අඛණ්ඩව ජයගත් හයවැනි ද්විපාර්ශ්වික එක්දින තරගාවලිය වීමද විශේෂත්වයකි. දෙරට අතර තෙවැනි එක්දින තරගය සැප්තැම්බර් 30 වැනිදා පොට්චෙෆ්ස්ට්‍රූම්හිදී පැවැත්වීමට නියමිතය.

එංගලන්තයේදී 'වයිට්-බෝල්' සංචාරයේ පළමු ජය ශ්‍රී ලංකාවට - දෙවන එක්දින තරගයෙන් ලකුණු 16ක අභිමානවත් ජයක්