ප්‍රවාහන ක්ෂේත්‍රයේ අලුත් පෙරළියක්- මාකුඹුර බහුමාධ්‍ය මධ්‍යස්ථානයේ නිල වෙබ් අඩවිය ජනතා අයිතියට

මාකුඹුර බහුමාධ්‍ය ප්‍රවාහන මධ්‍යස්ථානයේ නිල වෙබ් අඩවිය අද දියත් කළ බව ප්‍රවාහන නියෝජ්‍ය අමාත්‍ය ප්‍රසන්න ගුණසේන මහතා ප්‍රකාශ කළේය. නව වෙබ් අඩවිය ඔස්සේ මගීන්ට බස් සහ දුම්රිය කාලසටහන් මෙන්ම දිවයින පුරා පිහිටි බහුමාධ්‍ය ප්‍රවාහන මධ්‍යස්ථාන සම්බන්ධ වැදගත් තොරතුරු ලබාගත හැකිය.

මෙහි විශේෂත්වයක් ලෙස AI තාක්ෂණය මත පදනම් වූ “MAKU” නමැති මගී සහායකයෙකු හඳුන්වා දී ඇති අතර, ඒ හරහා මගීන්ට අවශ්‍ය ප්‍රවාහන තොරතුරු පහසුවෙන් ලබාගැනීමට හැකියාව ලැබේ.

ප්‍රවාහන යටිතල පහසුකම් නවීකරණය කිරීම සහ මගී පහසුකම් වැඩිදියුණු කිරීම සඳහා රජය ක්‍රියාත්මක කරන පුළුල් වැඩපිළිවෙළේ කොටසක් ලෙස මෙම වැඩසටහන ක්‍රියාත්මක කර ඇති බව නියෝජ්‍ය අමාත්‍යවරයා සඳහන් කළේය.

මෙම අවස්ථාවේදී බස් පර්යන්ත සහ රථවාහන කළමනාකරණය සඳහා නව පද්ධතියක් පිළිබඳව ද අවධානය යොමු වූ අතර, බස් රථ තත්‍ය කාලීනව නිරීක්ෂණය කිරීම සඳහා GPS තාක්ෂණය ඉදිරියේදී එක් කිරීමට නියමිත බව සාකච්ඡා කෙරිණි.

2027 වසරේ O/L, A/L සහ ශිෂ්‍යත්ව විභාග දින එළියට- විභාග දෙපාර්තමේන්තුවෙන් හදිසි නිවේදනයක්

එමෙන්ම දැනට ක්‍රියාත්මක “Park and Ride” ක්‍රමවේදය ද නිලධාරීන් විසින් සමාලෝචනය කර ඇති අතර, වාහන භාවිතය සහ විමෝචන පාලනය හරහා පරිසරයට සිදුවන බලපෑම අවම කිරීම පිළිබඳව ද අවධානය යොමු කර තිබේ.

යාන්ත්‍රික රථගාල් වැනි නව තාක්ෂණික විසඳුම් හඳුන්වා දෙමින් මෙම පද්ධතිය තවදුරටත් පුළුල් කිරීමට ද යෝජනා ඉදිරිපත් වී ඇත.

මගී ප්‍රවාහනය සම්බන්ධ දත්ත රැස් කිරීම සඳහා නව පද්ධතියක් ද ස්ථාපිත කර ඇති අතර, බස් රථ අංක, මගී සංඛ්‍යාව, උපරිම සහ අඩු මගී ප්‍රවාහන වේලාවන් මෙන්ම පැමිණීමේ ප්‍රමාදයන් ඇතුළු තොරතුරු එමඟින් වාර්තා කෙරේ.

මෙවැනි දත්ත ප්‍රවාහන ක්ෂේත්‍රයේ ඉදිරි සැලසුම් සහ තීරණ ගැනීම සඳහා ඉතා වැදගත් වන බව ප්‍රසන්න ගුණසේන මහතා අවධාරණය කළේය. දුම්රිය සේවා, දුරගමන් බස් සේවා සහ මෙට්‍රෝ බස් සේවා එකම මධ්‍යස්ථානයක් යටතේ ඒකාබද්ධ කරන බහුමාධ්‍ය ප්‍රවාහන මධ්‍යස්ථාන, පෞද්ගලික වාහන භාවිතය අවම කර පොදු ප්‍රවාහනය ප්‍රවර්ධනය කිරීම සඳහා වැදගත් කාර්යභාරයක් ඉටු කරන බව ද ඔහු සඳහන් කළේය.

ප්‍රවාහන යටිතල පහසුකම් තවදුරටත් ශක්තිමත් කිරීම සඳහා රජයේ ඉදිරි සැලසුම් තුළ බහුමාධ්‍ය ප්‍රවාහන මධ්‍යස්ථාන සඳහා ප්‍රමුඛත්වයක් ලබා දී ඇති බව නියෝජ්‍ය අමාත්‍යවරයා වැඩිදුරටත් පැවසීය.