පිරිපහදු ගින්නක් ඉන්ධන සලාකනයට හේතු නොවේ - ඕස්ට්‍රේලියානු අගමැති

ඕස්ට්‍රේලියාවේ ප්‍රධාන තෙල් පිරිපහදුවක ගින්නෙන් පසු ඉන්ධන නිෂ්පාදනය සැලකිය යුතු ලෙස පහත වැටී ඇතත්, දැඩි සීමාවන් හඳුන්වා නොදෙන බව අගමැති ඇන්තනි ඇල්බනීස් පවසා තිබේ. ගීලොන්ග් අසල වීවාහි පිහිටි කොරියෝ තෙල් පිරිපහදුවේ බදාදා මධ්‍යම රාත්‍රියේ උපකරණ අසාර්ථක වීම නිසා ඇති වූ ගින්න පැය 13කට අධික කාලයක් දැවී ගියේය.

මෙම පිරිපහදුව සාමාන්‍යයෙන් ඕස්ට්‍රේලියානු ඉන්ධන නිෂ්පාදනයෙන් 50%ක් සහ රටේ සමස්ත ඉන්ධන සැපයුමෙන් 10%ක් පමණ සපයයි. අගමැති ඇල්බනීස් අදහස් දක්වමින් පැවසුවේ, “දැනට ඩීසල් නිෂ්පාදනයෙන් සියයට 80ක් සහ ගුවන් ඉන්ධන නිෂ්පාදනයෙන් සියයට 80ක් අඛණ්ඩව සිදුවෙමින් පවතී. පෙට්‍රල් නිෂ්පාදනය ද සියයට 60කට අධික මට්ටමක පවතින අතර, ඉදිරි දිනවලදී එය තවත් ඉහළ යනු ඇතැයි අපි බලාපොරොත්තු වෙමු” යනුවෙනි. ගින්න නිසා ඉන්ධන මිල සහ සංචිත මත බලපෑම් ඇති විය හැකි බව රජය අනතුරු අඟවා ඇතත්, ජනතාව සන්සුන්ව සිටින ලෙස ඉල්ලා තිබේ.

ඕස්ට්‍රේලියාව දැනට ඉන්ධන ආරක්ෂාව සඳහා සකස් කර ඇති සිව් මට්ටමේ සැලැස්මේ දෙවන අදියරේ සිටීන අතර, ගින්න නිසා තෙවන අදියරට යාමට අවශ්‍ය නොවන බවත්, ඉන්ධන භාවිතය සීමා කරන පියවර (සලාකනය) හඳුන්වා නොදෙන බවත් අගමැති පැවසීය.

ඕස්ට්‍රේලියාව තවමත් ආනයනික ඉන්ධන මත බෙහෙවින් රඳා පවතින බැවින්, අගමැති ඇල්බනීස් මේ සතියේ නිවේදනය කළේ බෲනායි සහ දකුණු කොරියාවෙන් ඩීසල් ලීටර් මිලියන 100ක අමතර සැපයුමක් ලබාගත් බවයි. ඔහු වැඩිදුරටත් පැවසුවේ, ඕස්ට්‍රේලියාවට තමන්ගේම තෙල් පිරිපහදු යන්ත්‍ර වැඩිපුර තිබිය යුතු බවත්, ඉන්ධන ස්වයංපූර්ණත්වය වැඩි කිරීම අත්‍යවශ්‍ය බවත්ය.

ඊශ්‍රායලය සහ ලෙබනනය අතර සටන් විරාමයත් සමග ගෝලීය තෙල් මිල සුළු වශයෙන් පහත වැටෙයි