AI ක්ලෝනකරණ නඩුවේදී හඬ ප්‍රචාරණ අයිතියක් ලෙස ආරක්ෂා කළ යුතු බව ජපාන අධිකරණය තීන්දු කරයි

ජපානයේ අධිකරණයක් බදාදා දින තීන්දු කළේ, පුද්ගලයෙකුගේ රූපය භාවිත කිරීම සම්බන්ධ අයිතිවාසිකම් (portrait rights) මෙන්ම හඬ භාවිතය සම්බන්ධ අයිතිවාසිකම් ද 'ප්‍රසිද්ධියට පත්වීමේ අයිතිය' (publicity right) යටතේ ආරක්ෂා වන බවයි. මෙවැනි තීන්දුවක් ජපානයේ ලබා දුන් පළමු අවස්ථාව මෙයයි.

කෙසේ වෙතත්, ටෝකියෝ දිස්ත්‍රික් අධිකරණය විසින් පැමිණිලිකරු වන හඬ නළුවා (voice actor) කෙන්ජිරෝ සුඩාගේ ඉල්ලීම ප්‍රතික්ෂේප කරන ලදී. තමාගේ හඬට සමාන හඬක් යොදා ගනිමින් කෘත්‍රිම බුද්ධිය (AI) මගින් නිර්මාණය කළ වීඩියෝ ඉවත් කරන ලෙස ඔහු TikTok සමාගමෙන් ඉල්ලා තිබුණි.

විශේෂ රථවාහන සැලැස්මක් - හෙට සහ අනිද්දා දහවල් 1 සිට රාත්‍රී 8 දක්වා

සුඩා ප්‍රසිද්ධියට පත්ව ඇත්තේ "Jujutsu Kaisen" නම් ඇනිමෙ (anime) නිර්මාණයේ 'කෙන්ටෝ නනාමි' (Kento Nanami) චරිතයට හඬ කැවීමෙනි. ජපානයේ දැනට හඬ භාවිතය සම්බන්ධ අයිතිවාසිකම් පැහැදිලිව නිර්වචනය කරන නීති නොමැත.

නමුත් සැබෑ පුද්ගලයින්ගේ හඬට සමාන හඬවල් යොදා ගනිමින් සමාජ මාධ්‍ය වෙත වීඩියෝ උඩුගත කිරීම සහ ඒවා මගින් ආදායම් ඉපයීම අයිතිවාසිකම් උල්ලංඝනය කිරීමක් විය හැකි බවට අධිකරණ අමාත්‍යාංශය මෑතකදී මාර්ගෝපදේශ නිකුත් කර ඇත.

මෙම නඩුවට අනුව, නිර්නාමික පුද්ගලයෙකු විසින් 2024 ජූලි සහ 2025 සැප්තැම්බර් අතර කාලය තුළ නාගරික ජනප්‍රවාද, ගුප්ත විද්‍යාව සහ විවිධ තොරතුරු (trivia) පිළිබඳ වීඩියෝ 188ක් උඩුගත කර ඇති අතර, ඒවා සඳහා සුඩාගේ හඬට සමාන හඬක් යොදාගෙන තිබුණි.

රාජ්‍ය ආයතන 306ක් සඳහා වලංගු වන - HNB බැංකුවෙන් අලුත්ම වැඩක්

විශ්ලේෂණයකදී සුඩාගේ හඬ සහ AI මගින් නිර්මාණය කළ හඬ අතර දැඩි සමානකම් ඇති බව අනාවරණය වූ අතර, එමගින් නරඹන්නන් නොමඟ යැවෙන බව පැමිණිලිකරු ප්‍රකාශ කළේය.

වාණිජමය වටිනාකම ඉහළ නංවා ගැනීම සඳහා සුඩාගේ හඬේ ලක්ෂණ භාවිතා කරමින්, වීඩියෝ පළ කළ පුද්ගලයා මසකට යෙන් 500,000 සිට 750,000 දක්වා (ඇමරිකානු ඩොලර් 3,200 සිට 4,800 දක්වා) ආදායමක් උපයා ඇති බවට චෝදනා එල්ල විය.

එම වීඩියෝ සඳහා යොදාගෙන ඇත්තේ "සාමාන්‍ය පිරිමි හඬක්" බවත්, එය සුඩාගේ හඬ ලෙස වරදවා වටහා නොගන්නා බවත් TikTok සමාගම ප්‍රකාශ කළ අතර, වීඩියෝ පළ කළ පුද්ගලයා පැවසුවේ මිතුරෙකුගේ හඬ යොදාගෙන AI තාක්ෂණය පුහුණු කළ බවයි. එමෙන්ම, ජූනි 29 වන විට අදාළ ගිණුම (account) මකා දමා තිබූ බැවින් මෙම නඩුව පවත්වාගෙන යාමට තරම් පදනමක් නොමැති බව ද ඔවුහු තර්ක කළහ.