“මේක නගරයක්ද ඉඟුරු කෑල්ලක්ද” - නගරයේ පාරවල් ඉඟුරු වලට සමාන කළ ඉන්දිය තරුණිය [VIDEO]

ඉන්දියාවේ ගුර්ගාන් (Gurgaon) නගරයේ මාර්ග තත්ත්වය, අසංවිධානාත්මක සංවර්ධනය සහ දෛනික ගමනාගමන ගැටලු පිළිබඳ කාන්තාවක විසින් පළ කළ හාස්‍යජනක අදහස් ඇතුළත් වීඩියෝවක් මේ වන විට සමාජ මාධ්‍ය තුළ දැඩි අවධානයට ලක්ව තිබේ.

සක්ෂි (Sakshi) නමැති කාන්තාවක් විසින් ඉන්ස්ටග්‍රෑම් වෙත එක් කළ මෙම වීඩියෝවෙන් ඇය පවසන්නේ තමන් මීට පෙර ගුර්ගාන් වැනි නගරයක් දැක නොමැති බවයි. නගරයේ අසංවිධානාත්මක ව්‍යාප්තිය විස්තර කරමින් ඇය එය “ඉඟුරු” වලට සමාන කර තිබේ.

ඉඟුරු ගෙඩියක අතු සෑම දිශාවකටම අහඹුවෙන් වර්ධනය වන ආකාරයටම ගුර්ගාන් නගරයද සැලසුමකින් තොරව පැතිරී ඇති බව ඇය සඳහන් කර ඇත. විශේෂයෙන් වැසි සමයේදී නගරයේ මාර්ග තත්ත්වය ඉතා දුෂ්කර බව ඇය පවසයි. වැසි වැටුණු විට මාර්ගවල දැඩි අවුල් සහගත තත්ත්වයක් ඇති වන බවත්, ඇතැම් අවස්ථාවල නිවසින් පිටවීමට පවා අපහසු වන බවත් ඇය සඳහන් කර තිබේ.

පිටතට පැමිණියහොත් විශාල වළවල්වලට වැටීමේ අවදානමක් පවතින බවද ඇය හාස්‍යයෙන් පවසා ඇත. තවදුරටත් අදහස් දක්වමින් සක්ෂි ගුර්ගාන් නගරය විස්තර කර ඇත්තේ ධනවත් ව්‍යාපාරිකයකුගේ සුරතල් පුත්‍රයකු විසින් කිසිදු සැලසුමකින් තොරව තමන්ට අවශ්‍ය ආකාරයට ඉදිකළ ව්‍යාපෘතියක් ලෙසිනි.

“තමන්ටම නගරයක් අවශ්‍ය බව පියාට පවසා, කිසිදු සැලසුමකින් තොරව සියල්ල එකට එකතු කර ඇති ආකාරයක්” නගරය තුළ දක්නට ලැබෙන බව ඇය පවසා තිබේ.

දෛනික ගමනාගමනය පිළිබඳවද ඇය සිය අපහසුතාව පළ කරමින්, ගුර්ගාන් හරහා ගමන් කිරීම අතිශය කලකිරවන අත්දැකීමක් බවත්, සෑම දිනකම එම අත්දැකීමට මුහුණදීමට සිදුවන බවත් සඳහන් කර ඇත.

මෙම වීඩියෝවට සමාජ මාධ්‍ය පරිශීලකයන්ගෙන් විවිධ ප්‍රතිචාර ලැබී තිබේ. ඇතැම් පිරිස් ඇයගේ “ඉඟුරු” උපමාව ඉතා නිවැරදි බව පවසමින් අදහස් පළ කර ඇති අතර, තවත් අය ගුර්ගාන් වෙත යන සෑම අවස්ථාවකදීම තමන්ටද එවැනි අත්දැකීම් ලැබෙන බව සඳහන් කර තිබේ.

දුම් නැති දුම්රිය යුගයකට ඉන්දියාව සැරසෙයි - පළමු හයිඩ්‍රජන් දුම්රිය ධාවනයට සියල්ල සූදානම්

කන්තාවන් ලක්ෂ 92කට අහිමිවු මහාරාෂ්ට්‍රයේ සහනාධරය