ඉන්දියාව සහ උස්බෙකිස්තානය දිගුකාලීන යුරේනියම් සැපයුම් වැඩපිළිවෙළකට එකඟ වෙයි

ඉන්දියාව සහ උස්බෙකිස්තානය අතර දිගුකාලීන යුරේනියම් සැපයුම් වැඩපිළිවෙළක් ස්ථාපිත කිරීමට දෙරට එකඟ වී තිබේ. ඉන්දීය අග්‍රාමාත්‍ය නරේන්ද්‍ර මෝදි උස්බෙකිස්තාන ජනාධිපති ශව්කට් මිර්සියෝයෙව් සමඟ පැවති සාකච්ඡාවලින් අනතුරුව මෙම එකඟතාව නිල වශයෙන් ප්‍රකාශ කර ඇත.

“යුරේනියම් සැපයීම සඳහා දිගුකාලීන වැඩපිළිවෙළක්ද ස්ථාපිත කරනවා,” යනුවෙන් අග්‍රාමාත්‍ය මෝදි සඳහන් කර තිබේ. ඉන්දියාවේ දිගුකාලීන න්‍යෂ්ටික බලශක්ති සැලසුම් සඳහා මෙම ගිවිසුම වැදගත් වනු ඇතැයි අපේක්ෂා කෙරේ.

නව නගර සංවර්ධනයට GIFT City ආදර්ශයක්

ඉන්දියාව සහ උස්බෙකිස්තානය අතර නගර සහ ප්‍රාන්ත මට්ටමේ සහයෝගීතාවද තවදුරටත් පුළුල් කිරීමට අවධානය යොමු වී තිබේ. දෙරට අතර සහෝදර නගර සහ සහෝදර ප්‍රාන්ත ගිවිසුම් තුනක් අවසන් කිරීමේ කටයුතු සිදුවෙමින් පවතින බවද වාර්තා වේ.

උස්බෙකිස්තානය මේ වනවිට නව ටෂ්කන්ට් නගරය ඉදිකිරීමේ දැවැන්ත ව්‍යාපෘතියක් ක්‍රියාත්මක කරමින් සිටින අතර, එහි නගර සැලසුම්කරණය සඳහා ගුජරාට්හි GIFT City ව්‍යාපෘතියෙන් අත්දැකීම් ලබාගත හැකි බව මෝදි පෙන්වා දී තිබේ. ඒ සම්බන්ධයෙන් අත්දැකීම් හුවමාරු කර ගැනීම සඳහා උස්බෙක් නියෝජිත කණ්ඩායමක් ඉන්දියාවට පැමිණෙන ලෙසද ඔහු ආරාධනා කර ඇත.

නේපාල ගංවතුරේ දින 3ක් සුන්බුන් යට සිරවී සිටි දැරියකගේ ජීවිතය ගලවාගනී

දෙරටේ වෙළෙඳාම පළමු වරට ඩොලර් බිලියනය ඉක්මවයි

උස්බෙකිස්තාන ජනාධිපති මිර්සියෝයෙව් සඳහන් කර ඇත්තේ ඉන්දියාව තම රටේ විශ්වාසදායක උපායමාර්ගික හවුල්කරුවෙකු බවයි. පසුගිය වසරේදී දෙරට අතර ද්විපාර්ශ්වික වෙළෙඳාම පළමු වරට ඇමරිකානු ඩොලර් බිලියනය ඉක්මවා ගිය බවද ඔහු සඳහන් කළේය.

එමෙන්ම, මීට වසර කිහිපයකට පෙර පැවති මට්ටමට සාපේක්ෂව දෙරට අතර ඒකාබද්ධ ව්‍යාපාර සංඛ්‍යාව හත් ගුණයකින් ඉහළ ගොස් ඇති බවද ජනාධිපතිවරයා පෙන්වා දී තිබේ.

ඉන්දියානුවන්ට උස්බෙකිස්තානයට වීසා අවශ්‍ය නොවනු ඇත

දෙරට අතර සංචාරක සහ ජනතා සබඳතා තවදුරටත් පුළුල් කරමින්, දින 30ක් දක්වා කාලයක් සඳහා ඉන්දියානු පුරවැසියන්ට වීසා අවශ්‍යතාව ඉවත් කිරීමට උස්බෙකිස්තානය සූදානම් වන බවද ජනාධිපති මිර්සියෝයෙව් සඳහන් කර තිබේ.

මෙම පියවර සංචාරක කර්මාන්තය, ව්‍යාපාරික සංචාර සහ දෙරටේ ජනතාව අතර සබඳතා වර්ධනය කිරීමට උපකාරී වනු ඇතැයි අපේක්ෂා කෙරේ. මේ වනවිට දෙරට අතර සතියකට සෘජු ගුවන් ගමන් 14ක් ක්‍රියාත්මක වන බවද උස්බෙක් ජනාධිපතිවරයා සඳහන් කර ඇත.

සංස්කෘතික සහයෝගීතාවත් පුළුල් වෙයි

උස්බෙකිස්තානයේ ක්‍රියාත්මක ලාල් බහදූර් ශාස්ත්‍රි ඉන්දීය සංස්කෘතික මධ්‍යස්ථානය සහ මහත්මා ගාන්ධි ඉන්දීය අධ්‍යයන මධ්‍යස්ථානය දෙරටේ ජනතාව අතර සබඳතා ශක්තිමත් කිරීමට වැදගත් දායකත්වයක් ලබාදෙන බවද මිර්සියෝයෙව් සඳහන් කර තිබේ.

විශේෂයෙන් යෝගා සඳහා උස්බෙකිස්තානය තුළ ජනප්‍රියත්වය ඉහළ ගොස් ඇති අතර, 2018 වසරේ සිට එරට ජාතික යෝගා සම්මේලනයක්ද ක්‍රියාත්මක වේ. ඉන්දියාව සහ උස්බෙකිස්තානය වෙළෙඳාම, ආයෝජන, අධ්‍යාපනය, ඖෂධ, තොරතුරු තාක්ෂණය සහ සංස්කෘතිය ඇතුළු ක්ෂේත්‍ර රැසක සහයෝගයෙන් කටයුතු කරයි.

යුරේනියම් සැපයුම, න්‍යෂ්ටික බලශක්තිය සහ නගර සංවර්ධනය වැනි නව ක්ෂේත්‍ර එකතු වීමත් සමඟ මධ්‍යම ආසියානු කලාපයේ ඉන්දියාවට උස්බෙකිස්තානයේ වැදගත්කම තවදුරටත් ඉහළ යමින් පවතී.

අග්‍රාමාත්‍ය මෝදිගේ උස්බෙකිස්තාන සංචාරය අගෝස්තු 30 වැනිදා අවසන් වන අතර, ඉන් අනතුරුව ඔහු ෂැංහයි සහයෝගිතා සංවිධානයේ සමුළුවට සහභාගී වීම සඳහා කිර්ගිස්තානයේ බිෂ්කෙක් වෙත ගමන් කිරීමට නියමිතය.

හිටපු අගමැති ඉම්රාන් ඛාන් වෙනුවෙන් ප්‍රමුඛ හඬවල් රැසක්