ඉතිහාසගත දිනය - මධුරෝ සහ බිරිඳ අද අධිකරණයට

වෙනිසියුලානු හිටපු ජනාධිපති නිකොලස් මධුරෝ සහ ඔහුගේ බිරිඳ සීලියා ෆ්ලෝරස් අද (05) ප්‍රථම වරට එක්සත් ජනපද ෆෙඩරල් අධිකරණය හමුවේ ඉදිරිපත් කිරීමට නියමිත බව විදෙස් මාධ්‍ය වාර්තා කරයි.

පසුගිය ජනවාරි 3 වැනිදා කරකාස්හිදී එක්සත් ජනපද විශේෂ හමුදා මෙහෙයුමකින් මධුරෝ යුවළ අත්අඩංගුවට ගෙන එක්සත් ජනපදයට ගෙන ඒමෙන් පසු මෙම අධිකරණ පෙනී සිටීම සිදු වේ.

මත්ද්‍රව්‍ය ජාවාරම, ත්‍රස්තවාදයට සහාය දීම සහ කොකේන් එක්සත් ජනපදයට ආනයනය කිරීමේ කුමන්ත්‍රණ ඇතුළු බරපතල ෆෙඩරල් අපරාධ චෝදනා යටතේ නිව්යෝර්ක්හි මැන්හැටන් ෆෙඩරල් අධිකරණයේදී මෙම නඩු විභාගය ආරම්භ වේ. අද දහවල් කාලයේදී මෙම ප්‍රථම පෙනී සිටීම පැවැත්වෙන බව වාර්තා වේ.

එක්සත් ජනපද දිස්ත්‍රික් විනිසුරු ඇල්වින් කේ. හෙලර්ස්ටයින් මහතා විසින් මෙම නඩුව මෙහෙයවනු ඇති බව සඳහන් වේ.

එක්සත් ජනපද යුක්ති දෙපාර්තමේන්තුවේ චෝදනා අනුව, මධුරෝ සහ ඔහුගේ ප්‍රධාන සගයන් වසර 20කට අධික කාලයක් තිස්සේ වෙනිසියුලානු රජයේ බලය භාවිතා කරමින් කොකේන් මත්ද්‍රව්‍ය එක්සත් ජනපදයට ජාවාරම් කිරීමට පහසුකම් සැලසූ බවයි.

මධුරෝට එරෙහිව මෙම චෝදනා ප්‍රථම වරට එල්ල වූයේ 2020දී වන අතර, එවකට ඔහු එම චෝදනා දැඩි ලෙස ප්‍රතික්ෂේප කළේය.

මෙම අත්අඩංගුවට ගැනීම ලතින් ඇමරිකානු කලාපයේ බලවතුන්ගේ දැඩි විවේචනයට ලක්ව ඇති අතර, කියුබාව, නිකරගුවාව සහ බොලිවියාව වැනි රටවල් එය "අපරාධකාරී මැදිහත්වීමක්" ලෙස හෙළා දකිනු ලැබේ. ජනාධිපති ඩොනල්ඩ් ට්‍රම්ප් මහතා මෙම මෙහෙයුම "මහා ජයග්‍රහණයක්" ලෙස හැඳින්වීය.