ආශු සුරතල් බල්ලාට ලිංගික අතවර කරපු කතා ගැන එදා ප්‍රසිද්ධියේ කියපු ටික බොරු - හිරුණිකා පිළිගනී

සමගි ජන බලවේගයේ සාමාජිකාවක සහ හිටපු පාර්ලිමේන්තු මන්ත්‍රීනි හිරුණිකා ප්‍රේමචන්ද්‍ර, 2023 වසරේදී හිටපු පාර්ලිමේන්තු මන්ත්‍රී ආශු මාරසිංහට එරෙහිව එල්ල කළ චෝදනා ව්‍යාජ සාක්ෂි මත පදනම් වූ බව පිළිගෙන, ඔහුගෙන් ප්‍රසිද්ධියේ සමාව අයැද තිබේ.

අද (19) මාධ්‍ය වෙත අදහස් දක්වමින් ඇය පැවසුවේ,

“මම අධිකරණයේදී කළ වැරදි ප්‍රකාශ හේතුවෙන් ආශු මාරසිංහට දැඩි හානියක් සිදු වූ බව පිළිගෙන ඔහුගෙන් සමාව ඉල්ලා සිටියා. පසුව නඩුව අවසන් කිරීම සඳහා අපි සමථයකට පැමිණියා”

හිරුණිකා ප්‍රේමචන්ද්‍ර සඳහන් කළේ, 2023 දෙසැම්බර් 23 දින ආදර්ශ කරදාන නම් කාන්තාවක් සමගි වනිතා බලවේගයේ කාර්යාලයේදී ඇය හමුවී, මාරසිංහ තම සුරතල් බල්ලාට ලිංගික අතවර කරන බවට චෝදනා කරමින් වීඩියෝ සාක්ෂියක් ද පෙන්වූ බවයි.

එම සිද්ධිය සම්බන්ධයෙන් මාධ්‍ය හමුවක් පවත්වන ලෙස කරදාන දැඩිව ඉල්ලා සිටි බවත්, එය සමගි වනිතා බලවේගයේ කාන්තා සාමාජිකාවන්ගේ සහභාගීත්වයෙන් සංවිධානය කළ බවත් ඇය පැවසුවාය.

කෙසේ වෙතත්, පසුව සිදු වූ නීතිමය ක්‍රියාමාර්ගවලදී ඉදිරිපත් කළ වීඩියෝ සහ සාක්ෂි ගොතන ලද ඒවා බව ආශු මාරසිංහ පැහැදිලි කර තිබූ බව ප්‍රේමචන්ද්‍ර ප්‍රකාශ කළාය.

“මෙම කාන්තාව ආශු මාරසිංහට පෞද්ගලික පළිගැනීමක් කිරීමේ අරමුණින් කටයුතු කර ඇති බවත්, ඇය අපව භාවිත කර ඇති බවත් මට පසුව වැටහුණා”

යැයි ඇය වැඩිදුරටත් සඳහන් කළාය. 

කරදාන සම්බන්ධ කර ගැනීමට උත්සාහ කළද ඇයව සොයා ගැනීමට නොහැකි වූ බවත්, ඇය මේ වනවිට රට තුළ සිටිනවාද යන්න පවා නොදන්නා බවත් ප්‍රේමචන්ද්‍ර පැවසුවාය. හිරුණිකා ප්‍රේමචන්ද්‍ර සහ ආශු මාරසිංහ අතර පැවති සාකච්ඡාවලින් අනතුරුව අදාළ නඩුව සමථයකට පත් කර ඇති අතර, ඒ සමඟ මෙම ආරවුල අවසන් වී ඇති බව ද වාර්තා වේ.