රුධිර කාන්දු පෙරීමේ සේවා පුළුල් කිරීමට රජයේ සැලසුම්

දිවයින පුරා වකුගඩු රෝගීන් සඳහා රුධිර කාන්දු පෙරීමේ සේවාවන්හි ඉල්ලුම ඉහළ යාම හේතුවෙන්, රජයේ රෝහල්වල මෙම සේවාවන් රාජ්‍ය-පෞද්ගලික හවුල්කාරිත්ව ආකෘතිය ඔස්සේ පුළුල් කිරීමේ යෝජනාවට අමාත්‍ය මණ්ඩලය අනුමැතිය ලබා දී තිබේ.

දැනට රජයේ රෝහල් 80ක පමණ ඩයලිසිස් ඒකක ක්‍රියාත්මක වෙමින් පවතින නමුත්, වැඩිවන රෝගීන්ගේ අවශ්‍යතා සපුරාලීමට පවතින සම්පත් ප්‍රමාණවත් නොවන බව කැබිනට් ප්‍රකාශක, සෞඛ්‍ය හා ජනමාධ්‍ය අමාත්‍ය නලින්ද ජයතිස්ස මහතා ප්‍රකාශ කළේය. මෙම තත්ත්වය නිසා වකුගඩු රෝගීන්ට කාලෝචිත හා ප්‍රමාණවත් ප්‍රතිකාර ලබාගැනීමේදී අඛණ්ඩ අභියෝගවලට මුහුණ දීමට සිදුව තිබේ.

මහනුවර ජාතික රෝහලේ දැනටමත් ක්‍රියාත්මක රජයේ රෝහල්වල මෙම සේවාවන් රාජ්‍ය-පෞද්ගලික හවුල්කාරිත්ව ආකෘතියේ අත්දැකීම් උපයෝගී කරගෙන, තෝරාගත් අනෙකුත් රජයේ රෝහල්වලද සමාන හවුල්කාරිත්ව යාන්ත්‍රණ හඳුන්වාදීමට සුදුසු රාමුවක් සංවර්ධනය කිරීමට සෞඛ්‍ය අමාත්‍යාංශය සැලසුම් කරයි.

මෙම ආකෘතිය යටතේ, රුධිර කාන්දු පෙරීමේ යන්ත්‍ර, ප්‍රතිලෝම ඔස්මෝසිස් පද්ධති, අවශ්‍ය පරිභෝජන ද්‍රව්‍ය, ක්‍රියාකාරීත්වය සහ නඩත්තුව පෞද්ගලික හවුල්කරු විසින් සම්පූර්ණයෙන්ම මූල්‍යකරණය කර කළමනාකරණය කෙරේ. රජය විසින් යටිතල පහසුකම් සපයා පූර්ණ සායනික අධීක්ෂණය පවත්වාගෙන යාමට නියමිතය.

මෙම පියවර රජයේ රෝහල් සේවා අඩපණ කර පෞද්ගලික සේවා දිරිගැන්වීමක්ද යන ප්‍රශ්නයට පිළිතුරු දෙමින් අමාත්‍ය නලින්ද ජයතිස්ස මහතා පැවසුවේ, “මෙය ලබාදෙන සේවාවන් ශක්තිමත් කිරීමට පමණි. සේවාවන්ට අනුව ගෙවීම් කරන අතර, සෞඛ්‍ය සේවා රජයේ සෞඛ්‍ය කාර්ය මණ්ඩලය විසින් සපයනු ලැබේ. යන්ත්‍රෝපකරණ නඩත්තුව සමාගම් විසින් කරනු ලැබේ.”

නවීන තාක්ෂණය ඔස්සේ කාර්යක්ෂම සේවා සැපයීම මෙහි අරමුණ බවත්, රජය යටිතල පහසුකම් සපයා සායනික අධීක්ෂණය රඳවාගෙන සිටින බවත් ඔහු අවධාරණය කළේය.

වර්තමානයේ කොළඹ ජාතික රෝහලේ රුධිර කාන්දුකරණ සැසියකට රුපියල් 12,221ක පිරිවැයක් දරන අතර, මහනුවර රෝහලේ එය රුපියල් 10,713කි. මෙයින් රුපියල් 6,700ක් පෞද්ගලික සමාගමට ගෙවේ.