''ලෝකයම ඕකට කියන්නේ ඔන්ටාරියෝ විල කියලා"- ට්‍රම්ප්ගේ වැඩේට කැනඩාවෙන් සැර උත්තරයක්

ගූගල් සමාගම පවසන්නේ, එක්සත් ජනපදයේ පරිශීලකයන් සඳහා Google Maps හි “Lake Ontario” යන නාමය “Lake America” ලෙස යාවත්කාලීන කර ඇති බවයි. එම වෙනස ජනාධිපති ඩොනල්ඩ් ට්‍රම්ප් විසින් නිකුත් කළ විධායක නියෝගයකට අනුව සිදුකර තිබේ.

ට්‍රම්ප් විසින් පසුගිය බ්‍රහස්පතින්දා මෙම නම වෙනස් කිරීම නිවේදනය කළේ කැනඩාව සමඟ පවතින වෙළෙඳ ආරවුල උත්සන්න වෙමින් පවතින පසුබිමකය. එම වෙළෙඳ ගැටුම හේතුවෙන් දෙරට අතර ඩොලර් බිලියන ගණනක භාණ්ඩ සඳහා අන්‍යෝන්‍ය තීරුබදු පැනවී තිබේ.

ජනාධිපතිවරයාගේ විධායක නියෝගය එක්සත් ජනපදයේ නිල සිතියම් සඳහා භූගෝලීය නම් පිළිබඳ ප්‍රමිතීන් සකසන එක්සත් ජනපද භූගෝලීය නම් තොරතුරු පද්ධතිය (GNIS) වෙත බලපාන නමුත්, කැනඩාවේ නිල නාමකරණයට හෝ ලොව අනෙකුත් රටවල් විල හඳුන්වන ආකාරයට එය බලපෑමක් ඇති නොකරයි.

ගූගල් සඳහන් කරන්නේ, එක්සත් ජනපදයේ Google Maps භාවිත කරන පුද්ගලයන්ට “Lake America” ලෙසත්, කැනඩාවේ පරිශීලකයන්ට තවදුරටත් “Lake Ontario” ලෙසත් නම පෙන්වන බවයි. එක්සත් ජනපදය සහ කැනඩාවෙන් පිටත සිටින පරිශීලකයන්ට නම් දෙකම දැකගත හැකි වනු ඇත.

IOC එකෙනුත් ජනතාවට සහනයක් පෙට්‍රල් මිල අද ඉඳන් පහළට - අලුත් මිල ගණන් මෙන්න

මීට පෙරද ට්‍රම්ප් පරිපාලනයේ විධායක නියෝගයකට අනුව Google Maps විසින් “Gulf of Mexico” යන නාමය එක්සත් ජනපද පරිශීලකයන් සඳහා “Gulf of America” ලෙස වෙනස් කර තිබුණි. කැනේඩියානු අගමැති මාර්ක් කාර්නි වැවේ නම වෙනස් කිරීම ප්‍රතික්ෂේප කර ඇති අතර, නිව්යෝර්ක් ආණ්ඩුකාර කැතී හොචුල් ද සඳහන් කර ඇත්තේ නිව්යෝර්ක් ප්‍රාන්තය එම නම භාවිත නොකරන බවයි.

මේ අතර, ඔන්ටාරියෝ අගමැති ඩග් ෆෝඩ් සෙනසුරාදා වැව් ඉවුරේ “Lake Ontario: Now and Forever” යනුවෙන් ඉංග්‍රීසි සහ ප්‍රංශ භාෂාවලින් සඳහන් කළ දැවැන්ත පුවරුවක් නිරාවරණය කළේය. “ජනාධිපති ට්‍රම්ප්ට එය කැමති ඕනෑම නමකින් හැඳින්විය හැකි නමුත්, ලෝකයේ සෙසු රටවල් එය සැමවිටම ඔන්ටාරියෝ විල ලෙස හඳුන්වනු ඇත,” යනුවෙන් ෆෝඩ් ප්‍රකාශ කළේය.

ගූගල් සිතියම් දත්ත භාවිත කරන ඇතැම් ඔන්ටාරියෝ රජයේ වෙබ් අඩවිවලද නව නාමය දිස්වීමෙන් පසු, එම වෙබ් අඩවි සමාලෝචනය කර නිවැරදිව “Lake Ontario” යන නම පෙන්වන බව තහවුරු කිරීමට පියවර ගනිමින් සිටින බව ඔන්ටාරියෝ අමාත්‍ය ස්ටීවන් ක්‍රෝෆර්ඩ් පැවසීය.