සිඩ්නි බොන්ඩි වෙරළේ වීරයාට ලොව පුරා සිට ආධාර ගලා එයි

ඕස්ට්‍රේලියාවේ සිඩ්නි නුවර බොන්ඩි වෙරළේ සිදු වූ ත්‍රස්ත ප්‍රහාරයේදී ප්‍රහාරකයෙකුගෙන් තුවක්කුව බලහත්කාරයෙන් උදුරා ගත් වීරයෙකු වෙනුවෙන් ලොව පුරා සිට පරිත්‍යාග රැස් වෙමින් තිබේ.

මෙම වීරයා වන 43 හැවිරිදි මුස්ලිම් ජාතික දෙදරු පියෙකු වූ අහමඩ් අල් අහමඩ් (Ahmed al-Ahmed) ය. ඔහු ප්‍රහාරකයෙකු පිටුපසින් ගොස් රයිෆලය අල්ලා ගැනීමට සමත් වූ අතර, එම ක්‍රියාව නිසා තවත් බොහෝ ජීවිත හානි වළක්වා ගැනීමට හැකි වූ බව බලධාරීන් පවසයි.

ප්‍රහාරයෙන් තුවාල ලැබූ ඔහු සැත්කම් කිහිපයකට භාජනය වී රෝහලේ සුවය ලබමින් සිටියදී, ඔහුට සහාය දැක්වීම සඳහා පිහිටුවූ GoFundMe ව්‍යාපාරය මගින් එක දිනක් ඇතුළත ඕස්ට්‍රේලියානු ඩොලර් මිලියන 1.1කට අධික මුදලක් (ඇමරිකානු ඩොලර් මිලියන 0.74කට ආසන්න) රැස් කර ඇති බව රොයිටර්ස් පුවත් සේවය වාර්තා කරයි. (සටහන: මෙම මුදල දැන් ඊටත් වඩා ඉහළ ගොස් ඇති බව වාර්තා වෙමින් තිබේ.)

ඉරිදා සවස යුදෙව් හනුකා සැමරුමකට එල්ල වූ මෙම ප්‍රහාරය 50 හැවිරිදි පියෙකු සහ ඔහුගේ 24 හැවිරිදි පුත්‍රයා විසින් සිදු කළ බව ඕස්ට්‍රේලියානු පොලිසිය පවසයි. දශක තුනකට ආසන්න කාලයකට පසු රටේ සිදු වූ දරුණුතම සමූහ වෙඩි තැබීම ලෙස හඳුන්වන මෙම සිදුවීමෙන් පුද්ගලයන් 15 දෙනෙකු මිය ගොස් තවත් බොහෝ දෙනෙකු තුවාල ලබා ඇත.

අහමඩ්ගේ වීරත්වය ඕස්ට්‍රේලියානු අග්‍රාමාත්‍යවරයා, නිව් සවුත් වේල්ස් ප්‍රිමියර්වරයා සහ ජාත්‍යන්තර නායකයන් ඇතුළු බොහෝ දෙනෙකුගෙන් ප්‍රශංසාවට ලක් වී තිබේ.

බොන්ඩි වෙරළ තීරයේ වෙඩි තැබීමකින් මියගිය ගණන තවත් ඉහළට