ශ්‍රී ලංකාව ගැන විදේශ විශ්වාසය ඉහළට - සතියකදී බැඳුම්කරවලට ඩොලර් මිලියන 23ක්

ශ්‍රී ලංකා රුපියල් බැඳුම්කරවල විදේශ ආයෝජන පසුගිය සතියේදී තවත් ඉහළ ගොස් තිබේ. ශ්‍රී ලංකා මහ බැංකු දත්තවලට අනුව, ජූලි 16 වැනිදායින් අවසන් වූ සතිය තුළ විදේශ ආයෝජකයින් රජයේ රුපියල් බැඳුම්කරවල ශුද්ධ වශයෙන් රුපියල් බිලියන 7.66ක් ආයෝජනය කර ඇති අතර, එහි වටිනාකම ඇමරිකානු ඩොලර් මිලියන 23.2කි.

මෙම නව ආයෝජන සමඟ රුපියල් බැඳුම්කරවල විදේශ හිමිකාරිත්වය රුපියල් බිලියන 176.5ක් දක්වා ඉහළ ගොස් ඇති අතර, එය 2023 ජූලි 27 වැනිදායින් පසු වාර්තා වූ ඉහළම අගය බව මහ බැංකු දත්ත පෙන්වා දෙයි.

ඩොලරයේ විශාල වෙනසක් නැහැ - රුපියල තවදුරටත් ස්ථාවර මට්ටමක

මෙම වසර තුළ මේ දක්වා රුපියල් බැඳුම්කර සඳහා ලැබී ඇති සමස්ත විදේශ ආයෝජන ප්‍රමාණය ඇමරිකානු ඩොලර් මිලියන 106.6ක් දක්වා ඉහළ ගොස් තිබේ.

රුපියල ස්ථාවර වීම ආරම්භ වීමත් සමඟ පසුගිය සති හතර තුළදී පමණක් රුපියල් බිලියන 55.2කට වැඩි විදේශ ආයෝජන ප්‍රමාණයක් බැඳුම්කර වෙළෙඳපොළ වෙත ගලා ආ බව වාර්තා වේ.

මැයි 21 වැනිදා ඇමරිකානු ඩොලරයට සාපේක්ෂව රුපියලේ විකුණුම් අනුපාතය 354 දක්වා පහළ ගියද, පසුව එය යම් ප්‍රමාණයකින් යථා තත්ත්වයට පත්ව 340 මට්ටම ආසන්නයට පැමිණ තිබේ.

කෙසේ වෙතත්, මැදපෙරදිග පවතින අර්බුදකාරී තත්ත්වය සහ ගෝලීය ආර්ථික වර්ධනය පිළිබඳ අවිනිශ්චිතතා හේතුවෙන් ජාත්‍යන්තර ආයෝජකයින් තවදුරටත් අවධානයෙන් පසුවන බව විශ්ලේෂකයින් පවසයි.

පසුගිය වසරේදීද ශ්‍රී ලංකාවේ රුපියල් බැඳුම්කර වෙත රුපියල් බිලියන 71.5ක පමණ විදේශ ආයෝජන ගලා ආ තිබේ.

මේ අතර, ආනයන සීමා කිරීම සහ අවධමනකාරී ප්‍රතිපත්ති හේතුවෙන් පසුගිය කාලයේ විදේශ ආයෝජන ආකර්ෂණය වූ බව විශ්ලේෂකයින් පෙන්වා දෙයි.

එහෙත් ඉන්ධන මිල ඉහළ යාමත් සමඟ පසුගිය මාස තුන තුළ උද්ධමන තත්ත්වයේ යම් වර්ධනයක් දක්නට ලැබී ඇත.

උද්ධමන පීඩනය පාලනය කිරීම සඳහා ශ්‍රී ලංකා මහ බැංකුව මැයි මාසයේදී ප්‍රධාන ප්‍රතිපත්ති පොලී අනුපාතය පදනම් අංක 100කින් ඉහළ දැමීමට පියවර ගත්තේය.

පුනර්ජනනීය බලශක්ති ප්‍රසම්පාදන මිලකරණය පිළිබඳ මහජන උපදේශනය ආරම්භ වේ.