ස්විට්සර්ලන්තයේ මහල් නිවාස සංකීර්ණයක දරුණු ගින්නක්- 5ක් අතුරුදන් 8කට තුවාල

ස්විට්සර්ලන්තයේ තුසිස් නගරයේ මහල් නිවාස ද සහිත අවන්හලක් ගින්නකට හසුව සම්පූර්ණයෙන්ම විනාශ වීමෙන් පසු පුද්ගලයින් පස්දෙනෙකු අතුරුදන්ව ඇති අතර තවත් අටදෙනෙකු තුවාල ලබා තිබේ.

ග්‍රැබුන්ඩන් කැන්ටනල් පොලිසිය සඳහන් කළේ, ගින්න ගොඩනැගිල්ලේ දෙවන මහලෙන් හටගෙන ඇති බවට මූලික පරීක්ෂණවලදී අනාවරණය වී ඇති බවයි. කෙසේ වෙතත්, ගින්න ඇතිවීමට නිශ්චිත හේතුව මෙතෙක් අනාවරණය වී නොමැති අතර, ඒ සම්බන්ධයෙන් වැඩිදුර විමර්ශන ක්‍රියාත්මක බව පොලිසිය පවසයි.

ප්‍රාදේශීය වේලාවෙන් මධ්‍යම රාත්‍රියෙන් පසුව ගින්න පිළිබඳ දැනුම්දීම ලැබී ඇති අතර, එම ස්ථානයට ගිනි නිවන භටයින් 100කට ආසන්න පිරිසක් යොදවා තිබේ.

ගින්න මැඩපැවැත්වීමේ මෙහෙයුම් අතරතුර පඩිපෙළ කඩා වැටීම හේතුවෙන් ගොඩනැගිල්ලේ වහලය විවෘත කිරීමට දොඹකරයක් භාවිත කිරීමට සිදුව ඇති බව සඳහන් වේ.

2027 පාසල් වාර සටහන සහ නිවාඩු දින දර්ශනය නිකුත් වෙයි- පාසල් දින ගණන 197ක්

ගින්න හේතුවෙන් ගොඩනැගිල්ලේ සිටි පුද්ගලයින් 14 දෙනෙකුට ඉන් පිටතට පැමිණීමට හැකි වී තිබේ.

ඔවුන් අතරින් දෙදෙනෙකු බරපතළ තුවාල ලබා ඇති අතර, තවත් දෙදෙනෙකු මධ්‍යම මට්ටමේ තුවාල ලබා තිබේ. සිව්දෙනෙකු සුළු තුවාල ලබා ඇති බව පොලිසිය සඳහන් කළේය.

තුවාල ලැබූ පුද්ගලයින් අසල්වැසි චූර්, තුසිස් සහ ඉලාන්ස් නගරවල මෙන්ම සූරිච්හි රෝහල් වෙත ද රැගෙන ගොස් තිබේ.

මේ අතර, ගින්නෙන් පසු පුද්ගලයින් පස්දෙනෙකු පිළිබඳ තොරතුරු මෙතෙක් සොයාගත නොහැකි වී ඇති අතර, ඔවුන් සම්බන්ධයෙන් සෙවීම් සහ පරීක්ෂණ කටයුතු සිදුකරමින් පවතී.

නැගෙනහිර ස්විට්සර්ලන්තයේ පිහිටි ග්‍රැබුන්ඩන් කලාපය ශීත ක්‍රීඩා මෙන්ම ගිම්හාන කාලයේ ස්වභාවික ක්‍රියාකාරකම් සඳහා ජනප්‍රිය සංචාරක ගමනාන්තයක් ලෙස සැලකේ. ගින්නට හේතුව සම්බන්ධයෙන් පොලිසිය සහ රජයේ නීතිඥ කාර්යාලය එක්ව වැඩිදුර විමර්ශන සිදුකරමින් සිටින බව වාර්තා වේ.