FIFA සභාපති ඉන්ෆන්ටිනෝ වැරදි පිළිගනියි - ප්‍රසිද්ධියේ සමාව ඉල්ලා විශේෂ ප්‍රකාශයක්

පෞද්ගලික ආයෝජකයන්ට ජාත්‍යන්තර පාපන්දු තරගාවලිවල වාණිජ අයිතිවාසිකම්වල කොටස් ලබාදීමේ අරමුණින් ඉදිරිපත් කළ මතභේදාත්මක සැලසුම් සම්බන්ධයෙන් තමන් අතින් වැරදි සිදුවූ බව පිළිගනිමින් FIFA සභාපති ජියානි ඉන්ෆන්ටිනෝ ප්‍රසිද්ධියේ සමාව අයැද තිබේ.

මෙම මතභේදාත්මක යෝජනා හේතුවෙන් ලොව පුරා පාපන්දු බලධාරීන්ගෙන් සහ FIFA අභ්‍යන්තරයෙන්ද දැඩි විවේචන එල්ල වූ අතර, ඒ පිළිබඳ සාකච්ඡා කිරීම සඳහා මොරොක්කෝවේ රබාත් නුවර පිහිටි FIFA අප්‍රිකානු කාර්යාලයේදී ජ්‍යෙෂ්ඨ නිලධාරීන්ගේ විශේෂ හමුවක් කැඳවා තිබුණි.

''පරාජයේ වේදනාව විශාලයි සුව වීමට කාලයක් ගත වෙයි'' - මෙසීගෙන් සංවේදි පණිවිඩයක්

එම සාකච්ඡාවෙන් අනතුරුව FIFA කළමනාකරණ මණ්ඩලය සහ මහලේකම් මැටියාස් ග්‍රැෆ්ස්ට්‍රෝම් එක්ව නිකුත් කළ නිවේදනයකින් සභාපති ඉන්ෆන්ටිනෝ වෙත සිය පූර්ණ සහයෝගය නැවතත් තහවුරු කර තිබේ.

ඒ අනුව ඔහුගේ නායකත්වය සම්බන්ධයෙන් සංවිධානයේ විශ්වාසය තවදුරටත් පවතින බවද එහි සඳහන් වේ. කෙසේ වෙතත්, යුරෝපා පාපන්දු සම්මේලනය (UEFA) පසුගිය සති අන්තයේ ප්‍රකාශ කළේ ඉන්ෆන්ටිනෝ කෙරෙහි තමන්ට තිබූ විශ්වාසය බිඳවැටී ඇති බවයි.

ඔවුන්ගේ අදහස අනුව, "FIFA Forward Enterprise" (FFE) යෝජනාව ප්‍රමාණවත් විනිවිදභාවයකින් තොරව ක්‍රියාත්මක කිරීමට උත්සාහ කළ සැක සහිත ගනුදෙනුවක් ලෙස සැලකේ.

FIFA මහලේකම්වරයා අභ්‍යන්තර සේවකයන් වෙත යොමු කළ ලිපියකද මෙම සිදුවීම් "කණගාටුදායක සහ පිළිකුල් සහගත තත්ත්වයක්" ලෙස විස්තර කර තිබුණි.

එහෙත්, නිල රැස්වීමෙන් අනතුරුව සංවිධානයේ නායකත්වය ඉන්ෆන්ටිනෝට සහය පළ කළේය. සභාපති ඉන්ෆන්ටිනෝ සහ මහලේකම් ග්‍රැෆ්ස්ට්‍රෝම් විසින් FIFA නියෝජ්‍ය සභාපතිවරුන්, කවුන්සිලය සහ සාමාජික සංගම් 211 වෙත යොමු කළ ලිපියකින් තමන්ගේ ක්‍රියාමාර්ගවලදී වැරදි සිදුවූ බව පිළිගෙන අවංකව සමාව අයැද තිබේ.

එම ලිපියේ සඳහන් වන්නේ FFE නව අනුබද්ධ ආයතනය හරහා පිරිමි සහ කාන්තා ලෝක කුසලාන ඇතුළු තරගාවලි සඳහා පෞද්ගලික ආයෝජන ලබාගැනීමේ සැලසුම් සම්බන්ධයෙන් ප්‍රධාන පාර්ශ්ව සමඟ ප්‍රමාණවත් ලෙස සාකච්ඡා නොකිරීම වැරැද්දක් වූ බවයි.

එසේම එම සැලසුම් මාධ්‍යයට හෙළිවීමෙන් පසු තත්ත්වය කළමනාකරණය කිරීමේදීද දුර්වලතා පැවති බව ඔවුන් පිළිගෙන ඇත. කෙසේ වෙතත්, FIFA සංවිධානයේ කීර්තියට හා යහපාලන මූලධර්මවලට හානි වන කිසිදු ක්‍රියාවක් ඉදිරියේදී ඉවසන්නේ නැති බවත්, සංවිධානයේ නාමය සහ විශ්වසනීයත්වය ආරක්ෂා කිරීමට අවශ්‍ය සියලු පියවර ගන්නා බවත් එම නිවේදනයේ වැඩිදුරටත් අවධාරණය කර ඇත.

මේ අතර, කැනඩා අග්‍රාමාත්‍ය මාර්ක් කාර්නි සහ පෘතුගාලයේ හිටපු පාපන්දු තරුව ලුයිස් ෆිගෝ ඇතුළු පිරිසක් ඉන්ෆන්ටිනෝ ඉල්ලා අස්විය යුතු බවට අදහස් පළ කර තිබුණද, 56 හැවිරිදි ඔහු සිව්වන වරටත් FIFA සභාපති ධුරය සඳහා තරග කිරීමට සූදානමින් සිටියි.

2027 මාර්තු මාසයේ මොරොක්කෝවේ පැවැත්වීමට නියමිත FIFA කොංග්‍රසයේදී නව සභාපතිවරයා තෝරා ගැනීමට නියමිත අතර, අපේක්ෂක නාමයෝජනා භාරගැනීම නොවැම්බර් 18 දිනෙන් අවසන් වේ. UEFA විකල්ප අපේක්ෂකයකු ඉදිරිපත් කිරීමේ උත්සාහයක නිරත වුවද, අප්‍රිකානු සහ ආසියානු රටවලින් ඉන්ෆන්ටිනෝට තවදුරටත් ප්‍රබල සහයෝගයක් හිමිව ඇති බව වාර්තා වේ.

අර්ජන්ටිනාව සහ ස්පාඤ්ඤය අතර පාපන්දු ඉතිහාසයේ සම්පූර්ණ කතාව මෙන්න