ලංකාවේ ජනගහනයට මොකද වෙන්නේ? තරුණ පරපුර විවාහය මඟහරින ආර්ථික යථාර්ථය හෙළිවෙයි

තරුණ තරුණියන් අතර විවාහය සහ දරු ප්‍රසූතිය ප්‍රමාද වීම පවුල් ජීවිතය ප්‍රතික්ෂේප කිරීමක් ලෙස නොව, වත්මන් ආර්ථික හා සමාජීය යථාර්ථයන්ට දක්වන ප්‍රතිචාරයක් ලෙස තේරුම් ගත යුතු බව ශ්‍රී ලංකා ජනගහන සංගමයේ සභාපති සහ කොළඹ විශ්වවිද්‍යාලයේ ජන විකාශනය පිළිබඳ මහාචාර්ය මනෝරි කළුතන්ත්‍රි වීරතුංග පවසයි.

2026 ලෝක ජනගහන දිනය නිමිත්තෙන් අදහස් දක්වමින් ඇය සඳහන් කළේ ශ්‍රී ලංකාව මේ වන විට සශ්‍රීකත්වය අඩුවීම, ජනගහනය වයස්ගත වීම, තරුණ සංක්‍රමණය ඉහළ යාම සහ පවුල් රටාවන් වෙනස් වීම ඇතුළු සැලකිය යුතු ජනවිකාස වෙනස්කම්වලට මුහුණ දී සිටින බවයි.

''උඹ මට කිවුවා K-D මම ජීවත් වෙන්නෙ අද රෑ විතරයි කිවුවා උඹ මගේ පොඩි කාලෙ ඉඳලා යාලුවා කිවුවා'' සමාජ මාධ්‍ය කළඹමින් මිය ගිය තරුණයාගේ මිතුරෙකුගෙන් වෙනස් කතාවක් එළියට

ජීවන වියදම් ඉහළ යාම, රැකියා අවිනිශ්චිතතාව, දැරිය හැකි මිලකට නිවාස සීමිත වීම සහ වෘත්තීය පීඩනය හේතුවෙන් තරුණ පරපුර විවාහය සහ පවුලක් ආරම්භ කිරීම පිළිබඳ තීරණ නැවත සලකා බලමින් සිටින බවද ඇය පෙන්වා දුන්නාය.

ඇයගේ අදහස අනුව, වර්තමානයේ බොහෝ තරුණ තරුණියන් විවාහයට හෝ දෙමාපියභාවයට පිවිසීමට පෙර මූල්‍ය ස්ථාවරත්වය, සුරක්ෂිත රැකියාවක්, වෘත්තීය දියුණුව සහ පෞද්ගලික අරමුණු සපුරා ගැනීම කෙරෙහි වැඩි අවධානයක් යොමු කරති.

මෙවැනි අපේක්ෂාවන් ශ්‍රී ලංකාවට පමණක් සීමා වූ ඒවා නොවන අතර, ලොව පුරා සිදුවන සමාජ හා ආර්ථික වෙනස්කම්වල ස්වභාවික ප්‍රතිඵලයක් බවද මහාචාර්ය වීරතුංග සඳහන් කළාය.

එමෙන්ම, සශ්‍රීකත්වය අඩුවීම ක්ෂණික අර්බුදයක් ලෙස සැලකීම වෙනුවට, එය පුළුල් ජනවිකාස දත්ත සහ සාධක පදනම් කරගෙන විග්‍රහ කළ යුතු බවද ඇය අවධාරණය කළාය.

සශ්‍රීකත්වයේ වෙනස්කම් සඳහා අධ්‍යාපන අවස්ථා පුළුල් වීම, කාන්තා ශ්‍රම බලකා සහභාගීත්වය ඉහළ යාම, සංක්‍රමණය, ප්‍රමාද වන විවාහ සහ පවුල් සැලසුම් පිළිබඳ වෙනස් වන මනාපයන් වැනි කරුණු බලපාන බවද ඇය පැහැදිලි කළාය.

තරුණ පරපුරට ගුණාත්මක අධ්‍යාපනය, යහපත් රැකියා අවස්ථා, දැරිය හැකි නිවාස, ප්‍රවේශ විය හැකි සෞඛ්‍ය සේවා සහ පවුල් හිතකාමී සේවා ස්ථාන සපයන ප්‍රතිපත්ති ක්‍රියාත්මක කිරීමේ අවශ්‍යතාවයද ඇය අවධාරණය කළාය.

මී මුණුබුරන් 325කට මිත්තණිය වූ ලංකාවේ දීර්ඝායුෂ වාර්තාව තැබූ ඇය මෙලොවින් සමුගනී

. "තරුණ තරුණියන්ට ඔවුන්ගේ අභිලාෂයන් සාක්ෂාත් කර ගැනීමට අවශ්‍ය සහාය ලබාදීම සමාජ වගකීමක් පමණක් නොව, ශ්‍රී ලංකාවේ අනාගතය වෙනුවෙන් සිදුකරන වැදගත් ආයෝජනයක් ද වේ," යැයි මහාචාර්ය මනෝරි කළුතන්ත්‍රි වීරතුංග වැඩිදුරටත් පැවසුවාය.