වසර 7 ක් ගිහිල්ලත් පාස්කු ප්‍රහාරයට ලක්වූවන්ට යුක්තිය ඉටුවී නැහැ පාස්කු දින සජිත්ගෙන් චෝදනා

2019 ශ්‍රී ලංකාවේ පාස්කු ඉරිදා ප්‍රහාරයේ වින්දිතයින්ට යුක්තිය ඉටු කිරීම තවමත් රාජ්‍යයේ මූලික වගකීමක් බව විපක්ෂ නායක සජිත් ප්‍රේමදාස මහතා පවසයි.

වසර හතකට පසුවත්, පසුගිය සහ වත්මන් රජයන් දෙකම වගවීම ඉටු කිරීමට අපොහොසත් වී ඇති බව එතුමා සඳහන් කරයි. 

අද (අප්‍රේල් 5) නිකුත් කළ පාස්කු පණිවිඩයේ සදහන් කළේ පාස්කු ඉරිදා බලාපොරොත්තුව, අලුත් කිරීම සහ නව ආරම්භයන් නියෝජනය කරන නමුත් ශ්‍රී ලංකාව පුරා පල්ලි සහ හෝටල් ඉලක්ක කරගත් මරාගෙන මැරෙන බෝම්බ ප්‍රහාරවල වේදනාකාරී මතකයන් තවමත් පවතින බවයි.

2019 අප්‍රේල් 21 ප්‍රහාරවලින් මියගිය, තුවාල ලැබූ සහ පීඩාවට පත් වූවන්ට තවමත් යුක්තිය ඉටු නොවීම ජාතියක් ලෙස බරපතල අසාර්ථකත්වයක් බව ඔහු පැවසීය.

ජනාධිපතිතුමාගේ ලෝභ කම රටට හොදයි රංජන්ගෙන් සුපිරි සහතිකයක්

විශ්වාසය හා සාමය මත පදනම් වූ සමාජයක් ගොඩනැගීම, සියලු ජනවාර්ගික, ආගම් සහ ප්‍රජාවන් එක්සත් කිරීම, එවැනි ඛේදවාචක නැවත ඇති නොවන බව සහතික කිරීම සඳහා අත්‍යවශ්‍ය බව විපක්ෂ නායකවරයා සදහන් කර තිබේ.

 එතුමා පාස්කු දින සුබ පැතුම් එක්කරමින් තව දුරටත් සදහන් කළේ මෙවන් අදහසක්  

''පාස්කු මංගල්‍යය යනු බලාපොරොත්තුව, නැවත නැඟී සිටීම සහ සමාජයක් ලෙස නව ආරම්භයක් පිළිබඳ ව අපට මතක් කරවන පූජනීය අවස්ථාවකි. මෙම ආශීර්වාදයෙන් පිරි දිනයේ දී, ශ්‍රී ලාංකීය ජනතාව වෙත මාගේ සුභාශිංසන පිරිනැමීමට ලැබීම සතුටට කරුණක් සේ සලකමි. ජේසුස් ක්‍රිස්තුස් වහන්සේ විසින් නපුර පරදා නැවත උත්ථානය ලැබූ අවස්ථාව සිහිපත් කරමින් ලොව පුරා වෙසෙන කිතුනු බැතිමතුන් විසින් පාස්කු මංගල්‍ය අති උත්කර්ෂවත් අන්දමින් සමරනු ලබයි. දෙවියන් වහන්සේගේ පුත්‍රයා වූ ජේසුස් වහන්සේගේ දුක් විඳීම, මරණය සහ උත්ථානය සිහිපත් කරමින් දින 40ක චතාරිය සමය ගෙවන කිතුණු බැතිමතුන් උපවාසයේ නිරත වෙමින් සහ ආගමික වතාවත්වල නිරත වෙමින් පාස්කු මංගල්‍යයට එක් වෙති. නව බලාපොරොත්තු, අපේක්ෂා පෙරටු කර ගෙන පාස්කු මංගල්‍ය සැමරුවත් මීට වසර 7ට පෙර පාස්කු ඉරිදා දිනක අප රටේ දේවස්ථාන සහ හෝටල් කිහිපයක් එල්ල කර ගෙන සිදු වූ මරාගෙන මැරෙන මිලේච්ඡ ප්‍රහාරයේ වේදනාබර මතකය අප හදවත් තුළ තවමත් ඉතිරිව පවතී.

2019 අප්‍රේල් 21 වැනි දින සිදු වූ විනාශකාරී මේ ප්‍රහාරයෙන් මියගිය, තුවාල ලැබූ සහ සමීපතමයන් අහිමි වූ අපේම රටේ අපේම ජනතාවට තවමත් යුක්තිය ඉටු කිරීමට පැවති මෙන්ම පවතින රජයට ද නොහැකි වීම රටක් ලෙස අප ලැබූ මහත් පරාජයක් සේ සලකමි.

පාස්කු ඉරිදා දින සිදු වූ මිලේච්ඡ ප්‍රහාරයෙන් විපතට පත් පාර්ශ්වයන්ට සාධාරණය ඉටු කිරීම සහ සත්‍යය හෙළි කිරීම යනු අපගේ රාජ්‍ය පද්ධතියට අයත් අත්‍යවශ්‍ය වගකීමක් සහ වගවීමක් වේ. මේ වගකීමෙන් සහ වගවීමෙන් අප කාටවත් නිදහස් විය නොහැක. ඒ සඳහා නීතියේ ආධිපත්‍යය, වගකීම සහ විනිවිදභාවය අඛණ්ඩව පවත්වාගෙන යාම අතිශයින් වැදගත් බව අප පසක් කර ගත යුතුය.

මෙම කරුණු සම්බන්ධයෙන්, ආරම්භයේ සිටම දරන ස්ථාවරය වෙනස් නොවී, අද දින ද එයම පවත්වාගෙන යන බව අවධාරණය කරමි. අපගේ අනාගතය සුරක්ෂිත කරගැනීම සඳහා සියලු ජාති, ආගම් සහ ප්‍රජා එක්සත් කරමින්, විශ්වාසය හා සාමය මත පදනම් වූ සමාජයක් ගොඩනැගීම අප සැමගේ පොදු වගකීමකි. එමඟින් නැවත එවැනි විපතක් සිදු නොවන පරිදි ශක්තිමත් රාජ්‍යයක් සහ සමාජයක් නිර්මාණය කිරීම අප සැමගේම වගකීමකි. මෙම පාස්කු දින, අපි වින්දිතයන්ගේ මතකයට ගෞරවය පළ කරමින්, යුක්තිය, සාමය සහ එකමුතුව සඳහා අපගේ කැපවෙමින් සත්‍ය අනාවරණය කර ගැනීමට සැවොම එකතු වෙමු.  ''