මැලේසියාවේ ජීවමාන තරුව - මහතීර්ට 100ක්

මැලේසියාවේ හිටපු අගමැති මහතීර් මොහොමඩ් අද (10) සිය 100 වැනි ජන්ම දිනය සමරයි.

මැලේසියානු දේශපාලනයේ දැවැන්ත චරිතයක් වන මහතීර්, ඔහුගේ පරිවර්තනීය හා ඇතැම් විට මතභේදාත්මක නායකත්වය සඳහා ප්‍රකටය.

1981 සිට 2003 දක්වා රටේ සිව්වන අගමැති ලෙසත්, 2018 සිට 2020 දක්වා හත්වන අගමැති ලෙසත් සේවය කළ ඔහු, මැලේසියාවේ වැඩිම කාලයක් සහ වැඩිම වයසකින් යුත් අගමැතිවරයා ලෙස ඉතිහාසගත වේ.

“කේක්, මල්, ලිපි එවා මගේ 100 වැනි උපන්දිනයට සුබ පැතීමට පැමිණි සැමට ස්තූතියි. 100 වැනි වියට පත්වීම තරමක් බියකරුයි,” ඔහු විශේෂ සජීවී පොඩ්කාස්ට් වැඩසටහනකදී පැවසූ බව විදෙස් මාධ්‍ය වාර්තා කරයි.

මෙම පොඩ්කාස්ට් වැඩසටහනේදී, මහතීර් මැලේසියාවේ ඉතිහාසයේ ප්‍රධාන අවස්ථා සිහිපත් කළ අතර, පලස්තීන ජනතාවට සහයෝගය පළ කළේය. එසේම, චීනයේ නැගීම පිළිබඳව ද ඔහු අදහස් පළ කළ බව විදෙස් මාධ්‍ය වාර්තාවේ සඳහන් වේ.