මත්පැන් බෝතලේ ස්ටිකරය ගැන විශේෂ අනාවරණයක්

මෙරට අලෙවි කරන මත්පැන් බෝතල් මත අනිවාර්යයෙන්ම අලවනු ලබන ආරක්ෂිත ස්ටිකරය මුද්‍රණය කිරීම සඳහා රජය විසින් දරනු ලබන අධික වියදම එය කඩදාසි වෙනුවට ඩිජිටල් තාක්ෂණය ඔස්සේ සෘජුවම මුද්‍රණය කළ ද කිසිදු අඩුවීමක් සිදුව නොමැති බව රජයේ මුදල් පිළිබඳ කාරක සභාවේදී ඉතාමත් පැහැදිලිව අනාවරණය වී තිබේ.

අදාළ ආරක්ෂිත කඩදාසි ස්ටිකරය මෙරට මත්පැන් නිෂ්පාදනය කරනු ලබන ප්‍රධාන පෙළේ මත්පැන් සහ බීර සමාගම් දෙකක බෝතල් සඳහා සාර්ථකව ඇලවීමට තාක්ෂණික වශයෙන් නොහැකි වීම හේතුවෙන් එය බෝතලයේම සෘජු ඩිජිටල් මුද්‍රණයක් ලෙස සිදුකරන බව ද එහිදී වැඩිදුරටත් අනාවරණය වී තිබුණි.

රජයේ පාසල් ගුරුවරුන්ට දැඩි අර්බුදයක් - හදිසි අවශ්‍යතාවක් ගැන වෛද්‍යවරුන්ගෙන් උපදෙස්

රජයේ මුදල් පිළිබඳ කාරක සභාවේ වත්මන් සභාපති හර්ෂ ද සිල්වා මහතා විසින් මෙම ස්ටිකර් ගැටලුව සහ මත්පැන් නිෂ්පාදනය සිදුවන ආකාරය මෙන්ම වෙළඳපොළ තුළ කොතරම් හොර මත්පැන් විකිණෙනවාද යන්න පිළිබඳව එහිදී නිලධාරීන්ගෙන් දැඩි ලෙස ප්‍රශ්න කරන ලදී.

ඊට පිළිතුරු දෙමින් සාකච්ඡාවට එක්ව සිටි නියෝජ්‍ය සුරාබදු කොමසාරිස් එම් ජයන්ත සිල්වා මහතා ප්‍රකාශ කළේ මෙම ආරක්ෂිත ස්ටිකර් ව්‍යාපෘතිය මුලින්ම ආරම්භ කළේ 2022 වසරේදී බවයි.

ඉදිරි 2027 වසරේ ජනවාරි මස 2 වැනිදායින් පසුව දැනට ස්ටිකර් මුද්‍රණය කරනු ලබන විදේශීය ආයතනය සමඟ පවතින නිල ගිවිසුම සම්පූර්ණයෙන්ම අවසන් වන බැවින් ඒ සඳහා වහාම අලුත් ටෙන්ඩරයක් කැඳවීමට මේ වන විට සියලු කටයුතු කරගෙන යන බව ද ඔහු සඳහන් කළේය.

පවතින ක්‍රමවේදයට අනුව අදාළ සමාගම විසින් ස්ටිකර් මුද්‍රණය කර ලබා දිය යුතු අතර ඒවා බෝතල්වල ඇලවීම සිදුකරනු ලබන්නේ අදාළ මත්පැන් නිෂ්පාදකයා විසිනි.

එහිදී ආරක්ෂිත ස්ටිකර් 1000 ක් වෙනුවෙන් මූලිකව ඩොලර් 5.99 ක මුදලක් ගෙවන අතර ඊට එකතු වන වරාය ගාස්තු සහ තීරුබදු ගාස්තු ද ඇතුළුව සමස්ත වියදම ඩොලර් 7.99 ක් දක්වා ඉහළ යන බව ද හෙළි විය.

එහෙත් දේශීය මත්පැන් නිෂ්පාදන සමාගම් දෙකකින් එකක නිෂ්පාදන ක්‍රියාවලිය අධික ලෙස වේගවත් වීම නිසාත් අනෙක් සමාගමේ නිෂ්පාදන සිසිල් කර වෙළඳපොළට නිකුත් කරන බැවින් බෝතල් මතුපිට ජලය රැඳී තිබීම නිසාත් සාමාන්‍ය කඩදාසි ස්ටිකර් ඒවායේ ඇලවීමට සම්පූර්ණයෙන්ම නොහැකි වී තිබේ.

මේ හේතුව නිසා වර්තමානය වන විට එම සමාගම් දෙකෙහි බෝතල් සඳහා විශේෂ ඩිජිටල් ස්ටිකරයක් සෘජුවම මුද්‍රණය කරනු ලබයි.

සමාජ මාධ්‍යම කලඹමින් මිස්‍ටර් කොත්තුගේ වීඩියෝ ලීක් හිතාගන්නවත් බැරි තොරතුරු එළියට - පරුෂ වචනයෙන් බැන සේවකයන්ට පහර දුන්නට අත්අඩංගුවට ගැනීමට විමර්ශන

ඒ අනුව වර්තමාන මත්පැන් බෝතල්වලින් 80% කට වඩා වැඩි ප්‍රමාණයකම කිසිදු කඩදාසි ස්ටිකරයක් අලවන්නේ නැතිව සෘජුවම ඩිජිටල් මුද්‍රණය පමණක් වදින බව නියෝජ්‍ය සුරාබදු කොමසාරිස්වරයා මෙහිදී පිළිගත්තේය.

එම අවස්ථාවේදී කමිටු සභාපති හර්ෂ ද සිල්වා මහතා ප්‍රශ්න කර සිටියේ බෝතල් මත මෙලෙස ඩිජිටල් මුද්‍රණ පමණක් වදින විට ඒ සඳහා අදාළ සමාගමට කොපමණ මුදලක් රජයෙන් ගෙවනු ලබන්නේද යන්නයි.

ඊට පිළිතුරු දුන් නියෝජ්‍ය සුරාබදු කොමසාරිස්වරයා සඳහන් කළේ කිසිදු කඩදාසියක් භාවිත නොවන එම ඩිජිටල් මුද්‍රණය සඳහා ද රජය විසින් පෙර පරිදිම ඩොලර් 7.99 ක සම්පූර්ණ මුදලක් ගෙවනු ලබන බවයි.

එහිදී බලවත් ලෙස මවිතයට පත් වූ සභාපතිවරයා බෝතලයේ ඇලවීමට කිසිදු භෞතික ස්ටිකරයක් නොමැති තත්ත්වයක් තුළ සහ කඩදාසි මුද්‍රණයේ සිට ඩිජිටල් මුද්‍රණයට යන විට එහි සැබෑ නිෂ්පාදන වියදම 80% කින් පමණ අඩු විය යුතු පසුබිමක ඩිජිටල් මුද්‍රණයට ද මෙලෙස ඩොලර් 5.99 ක මූලික මුදලක් දිගින් දිගටම ගෙවන්නේ මන්දැයි නිලධාරීන්ගෙන් දැඩි ලෙස ප්‍රශ්න කළේය.

ඊට සෘජු පිළිතුරක් ලබා දෙමින් නියෝජ්‍ය සුරාබදු කොමසාරිස් එම් ජයන්ත සිල්වා මහතා අවසානයේ ප්‍රකාශ කළේ මුලින්ම ලබා දී ඇති රාජ්‍ය ටෙන්ඩර් ගිවිසුමේ අදාළ මිල ගණන් ඒ ආකාරයෙන්ම නියම කර දී ඇති බැවින් සැබෑ නිෂ්පාදන වියදම විශාල ලෙස අඩු වුව ද ස්ටිකරය මුද්‍රණය සඳහා යන එම ඉහළ වියදම දැනට ගිවිසුම්ගත අදාළ සමාගමට ඒ අයුරින්ම ලබා දීමට රජයට සෘජුවම සිදුව ඇති බවයි.