විශේෂ දැනුම්දීමක් - මේ ප්‍රදේශයට විශේෂ රථවාහන සැලැස්මක්

දඹුල්ල පොලිස් වසම කේන්ද්‍ර කරගනිමින් පැවැත්වෙන දැවැන්ත වෙසක් කලාපය නැරඹීම සඳහා දිවයිනේ විවිධ ප්‍රදේශවලින් දඹුල්ල නගරය වෙත විශාල ජනකායක් සහ රථවාහන සංඛ්‍යාවක් පැමිණෙමින් සිටිති.

මේ හේතුවෙන් නගරය තුළ ඇති විය හැකි අධික මාර්ග තදබදය මැනවින් පාලනය කරගැනීම සහ මහජනතාවගේ පහසුව උදෙසා ශ්‍රී ලංකා පොලීසිය විසින් විශේෂ විකල්ප රථවාහන සැලැස්මක් හඳුන්වා දී තිබේ.

මෙම විශේෂ රථවාහන සැලැස්ම වෙසක් කලාපය පැවැත්වෙන සෑම දිනකම පස්වරු 03.00 සිට මධ්‍යම රාත්‍රිය දක්වා ක්‍රියාත්මක වන බව දඹුල්ල පොලීසිය නිල වශයෙන් දැනුම් දෙයි.

පසුගිය මැයි 27 වැනිදා ආරම්භ වූ මෙම දඹුල්ල වෙසක් කලාපය එළැඹෙන ජූනි මස 02 වැනිදා දක්වා මහජනතාව වෙනුවෙන් විවෘතව පැවැත්වීමට නියමිතය.

පොලීසිය විසින් ප්‍රකාශයට පත් කර ඇති නව රථවාහන සැලැස්මට අනුව, අනුරාධපුර සහ හබරණ දෙස සිට පැමිණ නුවර සහ මාතලේ දෙසට ගමන් කිරීමට බලාපොරොත්තු වන සියලුම වාහන දඹුල්ල බස් නැවතුම්පොළ අසල පිහිටි නාමල් උයන මාර්ගයෙන් ඇතුළු විය යුතුය.

ඉන් අනතුරුව දඹුල්ල ආර්ථික මධ්‍යස්ථානය පිටුපස මාර්ගය ඔස්සේ ගොස් ඇනෝන් හන්දියෙන්  නැවත ප්‍රධාන මාර්ගයට පිවිස නුවර සහ මාතලේ දෙසට ධාවනය කළ හැකිය.

එමෙන්ම මාතලේ සහ නුවර දෙස සිට පැමිණෙන සියලුම බර වාහන පන්නම්පිටිය හන්දියෙන් ඇතා බැඳි වැව මාර්ගයට යොමු කෙරෙන අතර, එමඟින් තලකිරියාගම හන්දියට ගොස් නැවත කුරුණෑගල මාර්ගය ඔස්සේ දඹුල්ල දෙසට ගමන් කිරීමට අවස්ථාව සලසා ඇත.

කෙසේ වෙතත්, මාතලේ සහ නුවර දෙස සිට පැමිණෙන සාමාන්‍ය මගී ප්‍රවාහන බස් රථ, යතුරුපැදි සහ අනෙකුත් සැහැල්ලු වාහන සඳහා සාමාන්‍ය පරිදි මාතලේ - දඹුල්ල ප්‍රධාන මාර්ගයේම ගමන් කිරීමට බාධාවක් නොමැත.

පාසල් වාර සහ විභාග කාලසටහන් මාරු කරයි - සාමාන්‍ය පෙළ හා උසස් පෙළත් වෙනස් වෙයි

මීට අමතරව, බකමුණ සහ දෑලවෙල දෙස සිට පැමිණෙන වාහන කණ්ඩලම හන්දිය අසල පිහිටි හතරමං හන්දියෙන් වම් පසට ඇති විකල්ප මාර්ගයට යොමු විය යුතු අතර, එමඟින් නැවත නුවර - මාතලේ ප්‍රධාන මාර්ගයට පිවිසීමට රියදුරන්ට හැකියාව පවතියි.

වෙසක් කලාපය නැරඹීමට පැමිණෙන සහ එම මාර්ගවල ගමන් ගන්නා සමස්ත රියදුරන් මෙන්ම මහජනතාව ද පවතින තදබදය අවම කරගැනීම සඳහා මෙම නිශ්චිත කාලසීමාවන් තුළ ඉහත සඳහන් කළ විකල්ප මාර්ග  උපරිමයෙන් භාවිතා කරමින් පොලිස් නිලධාරීන්ට සහයෝගය දක්වන ලෙස ශ්‍රී ලංකා පොලීසිය කාරුණිකව ඉල්ලා සිටියි.

විශේෂයෙන් සැලකිලිමත්වන්න - මුළු ලංකාවටම පැය 24ක් යනතුරු වලංගු නිවේදනයක්