ඇමරිකානු පියාට දරුවන් දෙන්න බෑ කියා නිෂිකා දරුවනුත් අරන් පැනලා - බ්‍රිතාන්‍ය සහ ඇමරිකානු උසාවි සසල කළ නඩුව

අධිකරණ නියෝගයක් යටතේ එක්සත් රාජධානියේ සිදු කළ සංචාරයකින් පසු තම පුතුන් දෙදෙනා ඔවුන්ගේ ඇමරිකානු පියා වෙත භාර නොදුන් බවට චෝදනා එල්ල වී ඇති ශ්‍රී ලංකාවේ උපන් බ්‍රිතාන්‍ය කාන්තාවක් මාස තුනකට අධික කාලයක් එක්සත් රාජධානියේ සැඟවී සිටින බව විදෙස් මාධ්‍ය වාර්තා කරයි.

34 හැවිරිදි නිෂිකා සමරතුංග තම පුතුන් වන පස් හැවිරිදි බ්ලේන් බයර් සහ තුන් හැවිරිදි නතානියෙල් (නේට්) බයර් සමඟ සිටින ස්ථානය සඟවාගෙන සිටින බවට සැක පළ කෙරේ. දරුවන් දෙදෙනා එක්සත් ජනපදයේ උපත ලබා ඇති අතර, කොලරාඩෝ ප්‍රාන්තයේ ඩෙන්වර් නගරය ආසන්නයේ පදිංචි ඔවුන්ගේ පියා වන බෙන් බයර්ගේ භාරයේ සිටි බව සඳහන් වේ.

දෙමව්පියන්ගේ දික්කසාදයෙන් අනතුරුව අධිකරණ නියෝගයක් අනුව දරුවන් මාර්තු මාසයේදී එක්සත් රාජධානියේ තම මව බැලීමට ගොස් තිබුණි. කෙසේ වෙතත්, මාර්තු 29 වැනිදා ඔවුන් නැවත එක්සත් ජනපදයට රැගෙන යාම සඳහා ගුවන් තොටුපළේදී බේයර් මහතාට භාරදීමට සමරතුංග මහත්මිය අපොහොසත් වූ බවත්, එතැන් සිට ඇය සහ දරුවන් සොයා ගැනීමට නොහැකි වී ඇති බවත් වාර්තා වේ.

ලෝකෙම කතා කළ මෙසී සහ යමාල්ගේ ඇදහිය නොහැකි ඡායාරූපයේ කතාව - "එදා මාස 5ක බබෙක් අද මෙසීට එරෙහිව ලෝක කුසලාන ෆයිනල් එකේ!"

දරුවන් ආපසු ලබාදෙන ලෙස ඉල්ලා බේයර් මහතා ලන්ඩනයේ මහාධිකරණයේ නඩු පවරා තිබේ. ඔහුගේ නීතිඥයන් පවසන්නේ දරුවන් දෙදෙනාම ඔටිසම් තත්ත්වයෙන් පෙළෙන අතර, ඔවුන් පාසල් හෝ පෙර පාසල් අධ්‍යාපනයට සහභාගි නොවීම මෙන්ම අවශ්‍ය වෛද්‍ය ප්‍රතිකාර නොලැබීම පිළිබඳ දැඩි කනස්සල්ලක් පවතින බවයි.

මේ අතර, බේයර් මහතා ප්‍රකාශ කර ඇත්තේ තම විවාහය බිඳවැටීම දුෂ්කර අත්දැකීමක් වූවත්, දරුවන් තමන්ගෙන් වෙන් කර ඔවුන්ගේ සිටින ස්ථානය සඟවා තබනු ඇතැයි කිසිවිටෙකත් අපේක්ෂා නොකළ බවයි. ඔහු පවසන්නේ දරුවන් දෙදෙනාගේම ඔටිසම් තත්ත්වය හේතුවෙන් ඔවුන්ගේ දෛනික ජීවන රටාවේ හදිසි වෙනස්කම් ඔවුන්ගේ සෞඛ්‍යයට සහ සංවර්ධනයට අහිතකර විය හැකි බවයි. එමෙන්ම, දරුවන් සිටින ස්ථානය පිළිබඳ තොරතුරු දන්නා ඕනෑම අයෙකු ඒවා ආරක්ෂිතව නැවත නිවසට පැමිණීමට සහාය වන ලෙසද ඔහු ඉල්ලීමක් කර තිබේ.

දරුවන් සොයා ගැනීම සඳහා නඩුවේ තොරතුරු ප්‍රසිද්ධ කිරීමට ලන්ඩනයේ මහාධිකරණය අවසර ලබාදී ඇත. වාර්තා අනුව, බේයර් මහතා සහ සමරතුංග මහත්මිය 2020 වසරේදී විවාහ වී ඇති අතර, ඒ අනුව සමරතුංග මහත්මිය එක්සත් ජනපදයට සංක්‍රමණය වී තිබේ. 2024 වසරේදී ඔවුන්ගේ විවාහය බිඳවැටීමෙන් පසු, සමරතුංග මහත්මිය දරුවන් ලන්ඩනයට රැගෙන යාමට කොලරාඩෝ අධිකරණයෙන් අවසර ඉල්ලා ඇති නමුත් එම ඉල්ලීම ප්‍රතික්ෂේප වී තිබේ. ඉන් අනතුරුව ඇය නැවත එක්සත් රාජධානියට ගොස් ඇති බව සඳහන් වේ.

පසුව දරුවන් වෙනත් ස්ථානයකට ගෙන යාම සඳහා තවත් ඉල්ලීම් ඉදිරිපත් කළද, කොලරාඩෝ අධිකරණය බේයර් මහතා දරුවන්ගේ ප්‍රාථමික භාරකාර දෙමාපියා ලෙස නම් කර තිබේ. එමෙන්ම, දරුවන් කොලරාඩෝ ප්‍රාන්තයෙන් පිටත පදිංචියට නොයා යුතු බවටද නියෝග කර තිබුණි.

කෙසේ වෙතත්, අධිකරණ අනුමැතිය මත එක්සත් රාජධානියට සිදු කළ දෙවන සංචාරයෙන් පසු, දරුවන් නැවත බේයර් මහතා වෙත භාර නොදීමත් සමඟ මෙම ජාත්‍යන්තර භාරකාරත්ව ආරවුල උත්සන්න වී තිබේ.

සමරතුංග මහත්මිය සහ දරුවන් සොයා ගැනීමේ අරමුණින් ලන්ඩනයේ මහාධිකරණය බැංකු, සේවා සැපයුම්කරුවන් සහ රාජ්‍ය ආයතන කිහිපයකට තොරතුරු ලබාදෙන ලෙස නියෝග නිකුත් කර ඇති නමුත්, මේ දක්වා ඔවුන්ගේ සිටින ස්ථානය අනාවරණය වී නොමැත.

අප්‍රේල් මාසයේදී කොලරාඩෝ අධිකරණයක්, දරුවන් "ආසන්න අවදානමකට" ලක්විය හැකි බවට සැලකිල්ල දක්වමින්, අවශ්‍ය නම් ඔවුන් භාරයට ගැනීමට නීතිය ක්‍රියාත්මක කරන බලධාරීන්ට අවසර ලබාදී තිබේ.

එම නියෝගයේදී, සමරතුංග මහත්මිය අධිකරණ නියෝගයට පටහැනිව දරුවන් ආපසු භාරදීම වළක්වා ඇති බවටද සඳහන් කර ඇත. බේයර් මහතා වෙනුවෙන් පෙනී සිටින නීතිඥවරියක වන ඒමි රෝව් ප්‍රකාශ කර ඇත්තේ, දරුවන්ගේ වයස සහ ඔවුන්ගේ විශේෂ අවශ්‍යතා සැලකිල්ලට ගත් විට, ඔවුන් අතුරුදන්ව සිටින සෑම දිනකම ඔවුන්ගේ ආරක්ෂාව සහ සුබසාධනය පිළිබඳ කනස්සල්ල තවදුරටත් ඉහළ යන බවයි. ඇය වැඩිදුරටත් සඳහන් කළේ, දරුවන් හැකි ඉක්මනින් සොයාගෙන ආරක්ෂිතව තම නිවසට යොමු කිරීම අත්‍යවශ්‍ය බවයි.