මැදපෙරදිග දැවැන්ත යුද අර්බුදයක් - හෝමුස් සමුද්‍ර සන්ධියේදී නෞකාවකට ඉරානයෙන් වෙඩි ප්‍රහාරයක්

අනවසර මුහුදු මාර්ගයක් භාවිත කරමින් හෝර්මුස් සමුද්‍ර සන්ධිය හරහා ගමන් කිරීමට උත්සාහ කළ යාත්‍රාවකට අනතුරු ඇඟවීමේ වෙඩි ප්‍රහාරයක් එල්ල කිරීමෙන් පසු එම ජල මාර්ගය වසා දැමීමට පියවර ගත් බව ඉරාන ඉස්ලාමීය විප්ලවවාදී ආරක්ෂක බලකාය (IRGC) පවසයි.

ඉරාන ඉස්ලාමීය විප්ලවවාදී ආරක්ෂක බලකාය  (IRGC) නාවික අංශය විසින් නිකුත් කළ නිවේදනයක් උපුටා දක්වමින් අර්ධ රාජ්‍ය මාධ්‍ය වාර්තා කර ඇත්තේ, විදේශ බලවතුන්ගේ මැදිහත්වීම් ලෙස හඳුන්වන ක්‍රියාකාරකම් කිහිපයක් හේතුවෙන් මෙම තීරණය ගත් බවයි.

එම නිවේදනයේ සඳහන් කර ඇත්තේ, "අනවසර මාර්ග" ඔස්සේ සමුද්‍ර සන්ධිය තරණය කිරීමට උත්සාහ කළ යාත්‍රා කිහිපයක් සම්බන්ධයෙන් අවධානය යොමුව ඇති බවත්, එවැනි එක් යාත්‍රාවකට මෑතකදී අනතුරු ඇඟවීමේ වෙඩි තැබීමක් සිදු කළ බවත්ය.

ඉරානය හෝර්මුස් යලිත් වසා දමයි - ලෝක තෙල් වෙළෙඳපොළ දැඩි අර්බුදයක

කලාපීය අස්ථාවරත්වයට හේතු වන බාහිර මැදිහත්වීම් අවසන් වන තුරු සහ තත්ත්වය යථා තත්ත්වයට පත්වන තුරු හෝර්මුස් සමුද්‍ර සන්ධිය හරහා කිසිදු නෞකාවකට හෝ නාවික යාත්‍රාවකට ගමන් කිරීමට අවසර නොදෙන බව  ඉරාන ඉස්ලාමීය විප්ලවවාදී ආරක්ෂක බලකාය (IRGC) වැඩිදුරටත් ප්‍රකාශ කර ඇත.

මේ අතර, සටන් විරාමයක් පවතින බව සඳහන් වූ අවස්ථාවකදී පවා එක්සත් ජනපදය ප්‍රහාර එල්ල කළ බවට ඉරානය චෝදනා කර ඇති අතර, එවැනි තත්ත්වයක් මධ්‍යයේ වුවද එක්සත් ජනපදය සහ ඉරානය අතර සටන් විරාම සාකච්ඡා ඉදිරියට ගෙන යාමට හැකියාව පවතින බව ජනාධිපති ඩොනල්ඩ් ට්‍රම්ප් ප්‍රකාශ කර තිබේ.