මහින්ද එහෙම දෙකයි පනහේ වැඩ කරන්නේ නෑ - මල්වතු පාර්ශ්වය සමාජ මාධ්‍ය වදන්වලට පිළිතුරු දෙයි

මල්වතු මහා විහාර පාර්ශවයේ අතිපූජ්‍ය මහානායක ස්වාමීන් වහන්සේ වෙත හිටපු ජනාධිපති මහින්ද රාජපක්ෂ මහතා විසින් ශිරන්ති රාජපක්ෂ මහත්මිය අත්අඩංගුවට ගැනීම වැළැක්වීම සඳහා වත්මන් ජනාධිපතිතුමන් වෙත බලපෑම් කරන ලෙස ඉල්ලීමක් කළ බවට සමාජ මාධ්‍යයන්හි පැතිර යන පුවත සම්පූර්ණයෙන්ම අසත්‍ය, පදනම් විරහිත සහ සාවද්‍ය බව මල්වතු මහා විහාරය විසින් නිකුත් කරන ලද විශේෂ නිවේදනයක් මගින් තහවුරු කර ඇත.

මෙම නිවේදනය නිකුත් කර ඇත්තේ අතිපූජ්‍ය මල්වතු මහානායක ස්වාමීන් වහන්සේගේ උපදෙස්, උපනිර්දේශ සහ අධික්ෂණය යටතේ, මල්වතු මහා විහාරයේ උපලේඛකාධිකාරී අතිපූජ්‍ය මහවෙල රතනපාල ස්ථවිරයන් විසිනි.

මෙම නිවේදනය මගින් එවැනි ඉල්ලීමක් හෝ බලපෑමක් සිදුකිරීමට අදාළ හමුවක්, දුරකථන සංවාදයක් හෝ වෙනත් ආකාරයේ සන්නිවේදනයක් හිටපු ජනාධිපති මහින්ද රාජපක්ෂ මහතා සහ මහානායක ස්වාමීන් වහන්සේ අතර සිදුවී නොමැති බව ඉතා පැහැදිලිව සඳහන් කර ඇත.

මෙම සාවද්‍ය පුවත සමාජ මාධ්‍ය ඔස්සේ වේගයෙන් පැතිර යමින්, ජනතාව අතර අනවශ්‍ය ව්‍යාකූලත්වයක් සහ කැළඹීමක් ඇති කිරීමට උත්සාහ දරන බව මල්වතු මහා විහාරයේ නිවේදනයේ දැක්වෙයි. මෙවැනි අසත්‍ය තොරතුරු නිර්මාණය කිරීම, ප්‍රචාරය කිරීම සහ ඒවා බෙදා හැරීම තුළින් සමාජය තුළ විශ්වාසය බිඳවැටීමටත්, ආගමික හා සමාජීය සහජීවනයට හානි සිදුවීමටත් ඉඩ ඇති බව නිවේදනය අවධාරණය කරයි.

මල්වතු මහා විහාරයේ පාර්ශවය පවසන්නේ, මෙවැනි සාවද්‍ය තොරතුරු නිර්මාණය කරන, ප්‍රචාරය කරන හෝ බෙදා හරින පුද්ගලයින් හෝ සංවිධාන සම්බන්ධයෙන් ඉදිරියේදී නීතිමය ක්‍රියාමාර්ග ගැනීමට තමන් සූදානම් බවයි. එවැනි ක්‍රියාවන් මල්වතු මහා විහාරයේ ගෞරවයට, බුද්ධ ශාසනයේ ශුද්ධ වූ ගුණාංගවලට සහ සමාජ සාමයට හානිකර බවත්, එබැවින් එවැනි අනවශ්‍ය ක්‍රියාවන්ට එරෙහිව දැඩි පියවර ගැනීමට තමන් බැඳී සිටින බවත් නිවේදනයේ සඳහන් වෙයි.

මල්වතු මහා විහාරය, ශ්‍රී ලංකාවේ බුද්ධ ශාසනයේ ඓතිහාසික හා ආගමික ගෞරවයට පාත්‍ර වූ ආයතනයක් ලෙස, ජනතාවගේ විශ්වාසය හා ගෞරවය රැකගැනීමටත්, සමාජ සාමය හා සංහිඳියාව ආරක්ෂා කිරීමටත් සැමවිටම කැපවී ඇත. එබැවින්, මෙවැනි අසත්‍ය ප්‍රචාරයන්ට එරෙහිව තම භූමිකාව ඉටුකිරීමට මල්වතු මහා විහාරයේ මහානායක ස්වාමීන් වහන්සේ ඇතුළු සංඝ පරපුර කටයුතු කරන බවත් නිවේදනය මගින් අවධාරණය කර ඇත.

මල්වතු මහා විහාරයේ නිවේදනය මගින් ජනතාවගෙන් ඉල්ලා සිටින්නේ, සමාජ මාධ්‍ය ඔස්සේ පැතිර යන මෙවැනි අසත්‍ය තොරතුරු විශ්වාස නොකර, ඒවා බෙදා හැරීමෙන් වැළකී සිටින ලෙසයි. එසේම, එවැනි තොරතුරු ප්‍රචාරය කිරීමෙන් ජනතාව අතර අනවශ්‍ය භීතියක් හා ව්‍යාකූලත්වයක් ඇති විය හැකි බැවින්, වගකිවයුතු ලෙස කටයුතු කරන ලෙසත් එම නිවේදනය ජනතාවගෙන් ඉල්ලා සිටියි.

මෙම නිවේදනය තුළින් මල්වතු මහා විහාර පාර්ශවය තමන්ගේ ස්ථාවරය ඉතා පැහැදිලිව හා දැඩිව ඉදිරිපත් කර ඇති අතර, හිටපු ජනාධිපති මහින්ද රාජපක්ෂ මහතා සම්බන්ධයෙන් සමාජ මාධ්‍යයන්හි පැතිර යන පුවත් සම්පූර්ණයෙන්ම අසත්‍ය බව නැවතත් අවධාරණය කර ඇත. එවැනි පුවත් නිර්මාණය කරන්නන්ට හා ප්‍රචාරය කරන්නන්ට එරෙහිව නීතිමය ක්‍රියාමාර්ග ගැනීමට සූදානම් බවත්, ජනතාවගේ සාමය හා බුද්ධ ශාසනයේ ගෞරවය රැකගැනීමට තමන් කැපවන බවත් මල්වතු මහා විහාරය මෙම නිවේදනය තුළින් ප්‍රකාශ කර ඇත.