“සමේ පැහැය වැඩි කරගන්න ප්‍රතිකාර ගන්න තරුණ තරුණියෝ” - අහමදාබාද්හි දහස් ගණනක් වියදම් කරයි

ඉන්දියාවේ ගුජරාට් ප්‍රාන්තයේ අහමදාබාද් නුවර නවරාත්‍රි උත්සවයට සූදානම් වන පිරිසක් සමේ පෙනුම වැඩිදියුණු කරගැනීම සහ ශක්තිය ලබාගැනීමේ අරමුණින් විශේෂ IV ඩ්‍රිප් ප්‍රතිකාර සඳහා ඉන්දියානු රුපියල් 15,000ක් දක්වා වැය කරන බව වාර්තා වනවා.

සාමාන්‍යයෙන් උත්සවයකට පෙර රූපලාවන්‍යාගාර වෙත යාම සහ සම රැකගැනීමේ සත්කාර ලබාගැනීම වෙනුවට, ඇතැම් පිරිස් දැන් විටමින් සහ වෙනත් පෝෂක අඩංගු ද්‍රාවණ නහර හරහා ශරීරයට ලබාදෙන මෙම ප්‍රතිකාර කෙරෙහි යොමු වී තිබෙනවා.

 වාර්තාවට අනුව, මෙම ප්‍රතිකාරයක් සඳහා ඉන්දියානු රුපියල් 4,000ත් 10,000ත් අතර මුදලක් වැය වන අතර, උත්සව සමය වෙනුවෙන් වෙන්කර ඇති ප්‍රතිකාර පැකේජවල මිල රුපියල් 15,000ක් දක්වා ඉහළ යා හැකියි.

එම මිල ප්‍රතිකාරය ලබාදෙන සායනය සහ භාවිත කරන ද්‍රාවණයේ සංයුතිය අනුව වෙනස් වනවා.

තරුණයන්ට පමණක් සීමා නොවූ ප්‍රවණතාවක් මෙම ප්‍රවණතාව සමාජ මාධ්‍ය ඔස්සේ තරුණ පරපුරේ ජනප්‍රියත්වයට පත්ව තිබුණත්, අහමදාබාද්හි සායන වෙත පැමිණෙන පිරිස අතර වයස අවුරුදු 30 සහ 40 ගණන්වල පසුවන රැකියාවල නිරත පුද්ගලයන් ද සිටින බව වාර්තාව සඳහන් කරනවා.

විශේෂයෙන් දිගු සේවා වේලාවන් සහ රාත්‍රිය දක්වා පැවැත්වෙන ගාර්බා නර්තන උත්සව හේතුවෙන් ඇතිවන වෙහෙස සමනය කරගැනීම සඳහා ඇතැමුන් මෙම ප්‍රතිකාර තෝරාගන්නා බව සඳහන්.

අහමදාබාද්හි ප්‍රහ්ලාද් නගර් ප්‍රදේශයේ පදිංචි 24 හැවිරිදි ඩිජිටල් උපායමාර්ගික වෘත්තිකයකු වන රියා ෂා (නම වෙනස් කර ඇත) පවසන්නේ රැකියාවේ කාලසීමා සහ රාත්‍රී කාලයේ ගාර්බා නර්තනයට පුහුණුවීම් කිරීම හේතුවෙන් තම සම වෙහෙසට පත්වූ පෙනුමක් ගත් බවයි.

''ගඟෙන් අහසට නැඟුණු දැවැන්ත ජල කුළුණක් වැනි දුර්ලභ දසුනක් කැමරාවේ සටහන් වෙයි'' - චීනයේ “ජලය උරා බොන මකරා”

ඒ හේතුවෙන් මිතුරන්ගේ යෝජනාව මත ඇය එක් වරක් ලබාගන්නා සමේ පැහැපත් පෙනුම සඳහා වන IV ඩ්‍රිප් ප්‍රතිකාරයක් තෝරාගෙන තිබෙනවා. එමෙන්ම, 38 හැවිරිදි මූල්‍ය උපදේශක අමිත් පටෙල් පවසන්නේ මධ්‍යම රාත්‍රියෙන් පසුවත් පැය ගණනාවක් නර්තනයේ නිරත වීමෙන් පසු උදෑසන රැකියාවට යාම ශාරීරිකව වෙහෙසකර බවයි.

ඔහු ද මෙම ප්‍රතිකාරය උත්සව සමයට පමණක් සීමා වූ තේරීමක් ලෙස භාවිත කරන බව සඳහන් කර තිබෙනවා.

වෛද්‍යවරුන්ගෙන් අවවාදයක් කෙසේ වෙතත්, මෙම ප්‍රවණතාව අනුගමනය කිරීමට පෙර වෛද්‍ය උපදෙස් ලබාගැනීමේ වැදගත්කම සම්බන්ධයෙන් විශේෂඥයන් අවධාරණය කරනවා.

අහමදාබාද්හි සෝලා ප්‍රදේශයේ සේවය කරන චර්ම රෝග විශේෂඥ වෛද්‍ය කිංජල් මේතා පවසන්නේ IV ඩ්‍රිප් ප්‍රතිකාරය සාමාන්‍ය රූපලාවන්‍ය සත්කාරයක් ලෙස සැලකිය නොහැකි බවයි.

එය රෝගියාගේ සෞඛ්‍ය තත්ත්වය ඇගයීමෙන් පසුව, සුදුසු වෛද්‍ය අධීක්ෂණය යටතේ ලබාදිය යුතු ප්‍රතිකාරයක් බව ඇය පෙන්වා දෙනවා.

විශේෂයෙන් විටමින් සී, බී කාණ්ඩයේ විටමින්, සින්ක් සහ ග්ලූටතයෝන් වැනි සංඝටක අඩංගු ද්‍රාවණ වෛද්‍ය උපදෙස් නොමැතිව ලබාගැනීමෙන් අසාත්මිකතා, ශරීරයට අධික දියර ප්‍රමාණයක් ඇතුළුවීම සහ අක්මාවට අනවශ්‍ය බලපෑම් ඇතිවීම වැනි අවදානම් මතු විය හැකි බව ඇය අනතුරු අඟවනවා.

ඒ අනුව, උත්සවයකට පෙර සමේ පෙනුම හෝ ශාරීරික ශක්තිය වැඩිකරගැනීමේ අරමුණින් IV ඩ්‍රිප් ප්‍රතිකාරයක් ලබාගැනීමට පෙර පුද්ගල සෞඛ්‍ය තත්ත්වය පරීක්ෂා කර වෛද්‍ය උපදෙස් ලබාගැනීම වැදගත් වනවා.

“රොබෝවරුත් නිරූපිකාවන් සමඟ විලාසිතා දැක්මට එක්වෙයි” - බැංකොක් ජාත්‍යන්තර විලාසිතා සතිය උත්කර්ෂවත් ලෙස ඇරඹෙයි