කියෙව් ආසන්නයට එල්ල වූ රුසියානු ප්‍රහාරයකින් 27ක් මරුට - නිවාස 50කට හානි

රුසියානු හමුදා විසින් යුක්රේනයේ අගනුවර වන කියෙව් ආසන්නයේ සිදුකළ ප්‍රහාරයකින් අවම වශයෙන් පුද්ගලයන් 27 දෙනෙකු මියගොස් ඇති බව යුක්රේන බලධාරීහු පවසති.

කියෙව් නගරයට ආසන්න බුචා දිස්ත්‍රික්කයට එල්ල වූ මෙම ප්‍රහාරයෙන් නේවාසික ගොඩනැගිලි 50කට පමණ හානි සිදුව ඇති අතර, විශාල ගින්නක්ද හටගෙන තිබේ. එම ගින්න නිවාස සහ අවන්හලක් දක්වා පැතිර ගොස් ඇති බව බලධාරීහු සඳහන් කළහ.

ප්‍රාදේශීය හමුදා පරිපාලනයේ ප්‍රධානී ටිමූර් ට්කචෙන්කෝ පැවසුවේ ප්‍රහාරයෙන් පුද්ගල මරණ සහ විශාල දේපළ හානි සිදුව ඇති බවයි. යුක්රේන ජනාධිපති වොලොදිමීර් සෙලෙන්ස්කි සඳහන් කළේ Myla ගම්මානයේ ගබඩාවකට ප්‍රහාරයක් එල්ලවීමෙන් අනතුරුව විශාල පිපිරීමක් සිදුවූ බවයි.

නේවාසික ප්‍රදේශ ආසන්නයේ උණ්ඩ ගබඩා කිරීම සම්බන්ධයෙන් නීති රෙගුලාසි පවතින බව පෙන්වා දුන් සෙලෙන්ස්කි, මෙම සිද්ධිය සම්බන්ධයෙන් නිලධාරීන්ගේ නොසැලකිල්ල පිළිබඳව අපරාධ පරීක්ෂණයක්ද ආරම්භ කර ඇති බව සඳහන් කළේය.

Gen Z AI එක්ක ළඟම මිතුරෙක් වෙයි - පෞද්ගලික ගැටලුත් AI සමඟ කතා කරනවා නම් පරිස්සමින්

ප්‍රහාරයෙන් වැඩිහිටි පුද්ගලයන් සහ ආබාධ සහිත පුද්ගලයන් සඳහා වන රැකවරණ මධ්‍යස්ථානයකටද හානි සිදුව ඇති බව ඔහු පැවසීය. මේ වනවිට පුද්ගලයන් 370කට වැඩි පිරිසක් ආරක්ෂිත ස්ථාන වෙත ඉවත් කර ඇති අතර, ජනතාව ඉවත් කිරීමේ මෙහෙයුම් තවදුරටත් ක්‍රියාත්මක වෙමින් පවතින බවද සෙලෙන්ස්කි සඳහන් කළේය.

රුසියාව සහ යුක්රේනය මෑත මාසවලදී එකිනෙකා වෙත එල්ල කරන දිගු දුර ප්‍රහාර තීව්‍ර කර ඇති අතර, එම තත්ත්වය හේතුවෙන් ගිනි ගැනීම් සහ සිවිල් ජනතාවට සිදුවන හානි ඉහළ ගොස් තිබේ.

කියෙව් නගරයට බලපාන ගුවන් ප්‍රහාර අනතුරු ඇඟවීම් අඛණ්ඩව තෙවැනි දිනටත් ක්‍රියාත්මක වී ඇති අතර, එය නගරයේ ආර්ථික කටයුතු සහ ජනතාවගේ දෛනික ජීවිතයට දැඩි බලපෑමක් එල්ල කර තිබේ.

රුසියාව යුක්රේනයට එරෙහි පූර්ණ පරිමාණ ආක්‍රමණය ආරම්භ කර වසර හතරහමාරකට වැඩි කාලයක් ගතවී ඇතත්, දෙපාර්ශ්වය අතර ගැටුම් සහ දිගු දුර ප්‍රහාර තවදුරටත් අඛණ්ඩව පවතී.

නේපාලයේ ආපදා තත්ත්වයට ආසියානු සංවර්ධන බැංකුව මැදිහත් වෙයි - ADB විසින් ඩොලර් මිලියන 5ක ප්‍රදානයක් අනුමත කරයි