දකුණු අප්‍රිකාවේ N1 අධිවේගී මාර්ගයේ මාරක රිය අනතුරක්- කුඩා බස් රථ දෙකක් සහ SUV රථයක් ගැටී 21ක් මරුට

මාර්ග ගමනාගමන කළමනාකරණ සංස්ථාව සඳහන් කළේ, අනතුර සිදුවූ ස්ථානයේ පරීක්ෂණ කටයුතු තවදුරටත් සිදුවන බැවින් මියගිය සංඛ්‍යාව ඉහළ යා හැකි බවයි. අනතුරට ලක්වූ පුද්ගලයින් තිදෙනෙකු රෝහල්ගත කිරීමට රැගෙන ගියද, රෝහලට ඇතුළත් කරන අවස්ථාව වන විටත් ඔවුන් මියගොස් සිටි බව පොලිසිය පැවසීය.

බටහිර කේප් ප්‍රවාහන දෙපාර්තමේන්තුවට අනුව, කුඩා බස් රථ දෙකක් මුහුණට මුහුණ ගැටීමෙන් අනතුර ආරම්භ වී ඇති අතර, අනතුරෙන් පසුව SUV රථයක්ද එම වාහනවල ගැටී තිබේ.

අනතුර සම්බන්ධයෙන් නිල විමර්ශනයක් ආරම්භ කර ඇති අතර, විමර්ශන කටයුතු සඳහා N1 අධිවේගී මාර්ගයේ අනතුර සිදුවූ කොටස තාවකාලිකව වසා දමා තිබේ.

දකුණු අප්‍රිකාවේ මිලියන ගණනක ජනතාවක් දෛනික ප්‍රවාහන කටයුතු සඳහා කුඩා බස් රථ භාවිත කරන අතර, එම වාහන මාරාන්තික මාර්ග අනතුරුවලට නිරන්තරයෙන් සම්බන්ධ වේ.

ඉන්ධන මිල ගැන සප්තැම්බර් අගදී තීරණාත්මක පියවරක් - බලශක්ති අමාත්‍ය අනුර කරුණාතිලකගෙන් විශේෂ හෙළිදරව්වක්

මේ අතර, මෙම අනතුරට සමගාමීව අප්‍රිකානු කලාපයේ තවත් මාරක බස් අනතුරක් සම්බන්ධයෙන්ද වාර්තා පළ වී තිබේ. කේප් වර්ඩ් රාජ්‍යයේ ෆෝගෝ දූපතේදී සැප්තැම්බර් 5 වැනිදා රාත්‍රියේ සිදුවූ බස් රථ අනතුරකින් අවම වශයෙන් පුද්ගලයින් 25 දෙනෙකු මියගොස් තිබේ.

කඳුකර කැම්පනාස් ඩි සිමා මාර්ගයේදී බස් රථය මාර්ගයෙන් ඉවතට පැන මීටර් 30ක් පමණ පහළින් වූ ප්‍රපාතයකට පෙරළීමෙන් එම අනතුර සිදුව ඇති බව වාර්තා වේ.

මියගිය පිරිස අතර යොවුන් වියේ පසුවන්නන් ඇතුළු පාසල් සිසුන් විශාල පිරිසක් සිටි බව දේශීය මාධ්‍ය වාර්තා කළේය. සිද්ධිය සම්බන්ධයෙන් කේප් වර්ඩ් රජය දින දෙකක ශෝක කාලයක් ප්‍රකාශයට පත් කළ අතර, ජනාධිපති ජෝස් මරියා පෙරේරා නෙව්ස් එය “මහත් ව්‍යසනයක්” ලෙස හැඳින්වීය.

මියගිය පුද්ගලයින් වෙනුවෙන් සාමූහික අවමංගල්‍ය උත්සවයක් ඉරිදා සාඕ ලොරෙන්සෝ නගරයේ සාඕ ලොරෙන්සෝ දේවස්ථානයේදී පැවැත්විණි. එහිදී මියගිය අයගේ ඥාතීන් සහ ප්‍රදේශවාසීන් විසින් මිනී පෙට්ටි රැගෙන යමින් අවසන් ගෞරව දැක්වූහ.