කෙන්යාවේ පාසලක දරුණු ගින්නක් - 16ක් මරුට

කෙන්යාවේ ගිල්ගිල් ප්‍රදේශයේ පිහිටි ප්‍රසිද්ධ නේවාසික පාසලක අලුයම කාලයේ හදිසියේ හටගත් දරුණු ගින්නකින් සිසුන් 16 දෙනෙකු අවාසනාවන්ත ලෙස ජීවිතක්ෂයට පත්ව තිබේ.

විදෙස් මාධ්‍ය වාර්තා කරන්නේ ගින්න හේතුවෙන් තුවාල ලැබූ සහ දුමාරය ආග්‍රහණය වීමෙන් පීඩාවට පත් වූ තවත් සිසුන් 74 දෙනෙකු මේ වන විටත් රෝහල්ගතව හදිසි ප්‍රතිකාර ලබමින් සිටින බවයි.

එරට වේලාවෙන් අලුයම 1.00 ට පමණ මෙම අනතුර සිදුව ඇති අතර, එම අවස්ථාවේදී නේවාසිකාගාරය තුළ සිටි සියලුම සිසුන් තද නින්දේ පසුවීම හේතුවෙන් අනතුරේ සැර බිහිසුණු වී ඇත.

රජයේ විශේෂ නිවාඩු දිනයක් ප්‍රකාශයට - ගැසට් නිවේදනය නිකුත් වේ

සිසුන් 220කට ආසන්න පිරිසක් රැඳී සිටි මෙම නේවාසිකාගාර ගොඩනැඟිල්ල පුරා ගින්න ඉතා කෙටි වේලාවකදී වේගයෙන් පැතිර ගොස් තිබේ.

ගින්න හටගැනීමට නිශ්චිත හේතුව මෙතෙක් අනාවරණය වී නොමැති අතර, අතුරුදන් වූ සිසුන් සෙවීම සහ සුන්බුන් අතර සිරවී සිටින පිරිස් මුදාගැනීමේ විශේෂ මෙහෙයුම් කෙන්යානු පොලිසිය සහ සහන සේවා කණ්ඩායම් එක්ව තවදුරටත් ක්‍රියාත්මක කරමින් පවතින බව වාර්තා වේ.

ගින්නත් සමඟ ගොඩනැඟිල්ල තුළ ඇති වූ දැඩි කලබලකාරී හා බියකරු වාතාවරණය හමුවේ ජීවිත බේරාගැනීම සඳහා ඇතැම් සිසුන් නේවාසිකාගාරයේ ඉහළ මහල්වලින් බිමට පැන ඇති අතර, එමඟින් ඔවුන්ට බරපතළ තුවාල සිදු වී තිබේ.

එමෙන්ම තවත් සිසුන් පිරිසක් ගින්නෙන් බේරීමට දිව ගොස් පාසල අවට ඇති වනාන්තර සහ ගම්මාන දෙසට පලාගොස් ඇති බව ද එරට බලධාරීහු තහවුරු කරති.

කෙන්යාවේ පිහිටි නේවාසික පාසල් තුළ මෙවැනි මාරාන්තික ගිනිගැනීම් වාර්තා වීම දුර්ලභ සිදුවීමක් නොවන අතර, මෑත වසර කිහිපය පුරාම එරටින් මෙවැනි ඛේදවාචක රැසක් වාර්තා වී ඇත.

සෞඛ්‍ය අවදානමක් ගැන වෛද්‍යවරුන්ගෙන් අනතුරු ඇඟවීම්

මෙලෙස කෙටි කලක් තුළ විශාල පිරිසක් මියයෑමට සහ තුවාල ලැබීමට ප්‍රධානතම හේතුව වී ඇත්තේ එරට පාසල් නේවාසිකාගාර තුළ පවතින අධික සිසු තදබදය සහ නිසි ගිනි ආරක්ෂණ උපදෙස් මෙන්ම හදිසි පිටවීමේ දොරටු වැනි ආරක්ෂිත විධිවිධාන පිළිපැදීමට පාසල් බලධාරීන් අසමත් වීම බව ද විදෙස් විචාරකයෝ පෙන්වා දෙති.