සාම්ප්‍රදායික සාරිය හෝ ලෙහෙන්ගා ඇඳුම වෙනුවට කළු සහ රන්වන් පැහැයෙන් යුත් නවීන විලාසිතාවක් තෝරා ගැනීම මෙහි විශේෂත්වයක් විය.
එම ඇඳුම් කට්ටලයට රන්වන් පැහැති සංකීර්ණ සර්දෝසි එම්බ්‍රොයිඩර් මෝස්තරවලින් අලංකාර කළ කළු පැහැති බ්‍රැලට් එකක්, ඊට ගැළපෙන කෙටි ස්කෝර්ට් සායක් සහ බිම දක්වා දිගු කේප් එකක් ඇතුළත් විය.
මෙම ඇඳුම් කට්ටලයේ වඩාත් කැපී පෙනෙන අංගය වූයේ දිගු කේප් එකයි. එය රන්වන් පැහැති ඉරි, එම්බ්‍රොයිඩර් කළ මායිම් සහ අත් හා පහළ කොටසෙහි සියුම් මෝස්තරවලින් සමන්විත විය.
ඇයගේ පෙනුමට ගැළපෙන ලෙස රන්වන් පැහැති මාං ටිකා ආභරණයක් සහ විශාල සාම්ප්‍රදායික කරාබු යුගලයක් ද පැළඳ සිටියාය.
මධ්‍යයෙන් බෙදා සකස් කළ කොණ්ඩා මෝස්තරය සහ ලෝහමය පටි සහිත උස සපත්තු ඇගේ පෙනුමට තවත් ආකර්ෂණයක් එක් කළේය.
ඔක්තෝබර් 31 වැනිදා සන්යා මල්හෝත්‍රා සිය ඉන්ස්ටග්‍රෑම් ගිණුමට එක් කළ ඡායාරූප පෙළක් මගින් මෙම දීපවාලි සැමරුමේදී ඇයගේ විලාසිතාව රසිකයන් සමඟ බෙදාගෙන තිබිණි.
සාම්ප්‍රදායික ඉන්දීය එම්බ්‍රොයිඩර් කලාව නවීන ඇඳුම් හැඩතල සමඟ මුසු කරමින් නිර්මාණය කර තිබූ මෙම ඇඳුම් කට්ටලය මසාබා ගුප්තාගේ නිල වෙබ් අඩවියට අනුව ඉන්දීය රුපියල් ලක්ෂ 22ක මිලකට අලෙවි වේ.
CAA ආයතනයට අනුව, ඔක්තෝබර් 27 සිට 30 දක්වා එන්ජින් ඔයිල්, ගියර් ඔයිල්, අනෙකුත් මෝටර් රථ ලිහිසි තෙල් සහ ග්‍රීස් අලෙවි කරන ව්‍යාපාර ආවරණය කරමින් පරීක්ෂණ සිදු කරන ලදී. වැඩිදුර පරීක්ෂණ සඳහා සාක්ෂි ලෙස නිලධාරීන් නිෂ්පාදන කිහිපයක් ද අත්අඩංගුවට ගෙන ඇත.
සැක සහිත උල්ලංඝනයන් 2023 අප්‍රේල් 12 වන දින අංක 2327/36 දරන අතිවිශේෂ ගැසට් පත්‍රය යටතේ නිකුත් කරන ලද අංක 88 දරන විධානයට අදාළ වේ.
රෙගුලාසි යටතේ, ලිහිසි තෙල් සහ ග්‍රීස් ආනයනය කරන හෝ නිෂ්පාදනය කරන ව්‍යාපාරවලට ශ්රී ලංකා රජය සමඟ වලංගු ගිවිසුමක් තිබිය යුතුය. විකිණීම සඳහා පිරිනමන නිෂ්පාදන ඇසුරුම්කරණයේ හෝ ස්ථිර ලේබලයක මුද්‍රණය කර ඇති අදාළ රජයේ ගිවිසුම් අංකය ද ප්‍රදර්ශනය කළ යුතුය.
අනවසර නිෂ්පාදන වෙළඳපොළට ඇතුළු වීම වැළැක්වීම සහ පාරිභෝගිකයින්ට නීත්‍යානුකූලව බලයලත් සැපයුම්කරුවන් හඳුනා ගැනීමට උපකාර කිරීම මෙම රෙගුලාසිවල අරමුණ බව CAA ආයතනය පැවසීය.
කෙසේ වෙතත්, රජයේ ගිවිසුම් අංකයක් ප්‍රදර්ශනය කිරීමෙන් නිෂ්පාදනයක ගුණාත්මකභාවය සහතික කළ නොහැකි බව අධිකාරිය පැහැදිලි කළේය.
වැඩිදුර විමර්ශන සිදුවෙමින් පවතින අතර, ප්‍රමාණවත් සාක්ෂි තහවුරු වුවහොත් වෙළඳුන්ට සහ අනෙකුත් වගකිවයුතු පාර්ශවයන්ට එරෙහිව මහේස්ත්‍රාත් අධිකරණවල නීතිමය ක්‍රියාමාර්ග ආරම්භ කරනු ලැබේ.
එන්ජින් ඔයිල්, ගියර් ඔයිල් සහ ග්‍රීස් මිලදී ගැනීමේදී නිෂ්පාදන ලේබල් පරීක්ෂා කර රිසිට්පත් ලබා ගන්නා ලෙස පාරිභෝගිකයින්ට උපදෙස් දී ඇත.
වෙළඳපල පරීක්ෂණ දිගටම කරගෙන යන බව CAA පැවසූ අතර කාර්යාල වේලාවන් තුළ එහි 1977 ක්ෂණික ඇමතුම් අංකය හරහා සැක සහිත උල්ලංඝනයන් වාර්තා කරන ලෙස මහජනතාවගෙන් ඉල්ලා සිටියේය.
ශ්රී ලංකා සිවිල් ගුවන් සේවා අධිකාරියේ (CAA) නිල උපදෙස් අංක 88 මගින් ගැසට් පත්‍රයේ සඳහන් අවශ්‍යතා තහවුරු කරනු ලැබේ.
]]>එහි සඳහන් වන්නේ ඔබේ වීසා බලපත්‍රය අනිසි ලෙස භාවිත කළහොත් හෝ අවසර දී ඇති කාලසීමාව ඉක්මවා එක්සත් ජනපදයේ රැඳී සිටියහොත්, අනාගතයේදී එක්සත් ජනපදයට සංචාරය කිරීම ස්ථිරවම තහනම් වීමට ඉඩ ඇති බවය.
මීට අමතරව අමෙරිකා එක්සත් ජනපදය වෙත B1/B2 සංචාරක වීසා බලපත්‍රයක් මඟින් ඇතුළු වන සංචාරකයින් සඳහා එරට බලධාරීන් විසින් වැදගත් මතක් කිරීමක් නිකුත් කර බලධාරීන් පෙන්වා දෙන්නේ වීසා නීතිරීතිවලට අනුකූලව කටයුතු කිරීම සම්පූර්ණයෙන්ම සංචාරකයාගේ වගකීමක් වන අතර, නීති උල්ලංඝනය කිරීම් දැඩි ලෙස සැලකිල්ලට ගතයුතු බවයි.
මෙම වීසා බලපත්‍රය යටතේ අමෙරිකාවට ඇතුළු වන පුද්ගලයින්ට කළ හැකි සහ කළ නොහැකි දේවල් මොනවාද යන්න පිළිබඳව දැනුම් දී තිබේ. ඒ අනුයව,
🟢 කළ හැකි දේ
කොන්ත්‍රාත් සාකච්ඡා පැවැත්වීම
ව්‍යාපාරික සමුළු සහ සම්මන්ත්‍රණ සඳහා සහභාගී වීම
🔴 කළ නොහැකි දේ
අමෙරිකා එක්සත් ජනපදය තුළදී කිසියම් ආකාරයක තමාට කරන මුදල් ගෙවීමක් (Payment) ලබා ගැනීම
ඇමරිකානු සේවා යෝජකයෙකු යටතේ සේවය කිරීම
ඔබේ වීසා බලපත්‍රය නිසි පරිදි සහ නීත්‍යානුකූලව භාවිත කිරීම සම්පූර්ණයෙන්ම ඔබේ වගකීමක් වන බැවින්, වීසා කොන්දේසි කඩවීමෙන් සිදුවිය
හැකි නීතිමය ගැටලුවලින් වැළකී සිටින ලෙස බලධාරීහු වැඩිදුරටත් අවධාරණය කරති. වැඩි විස්තර සඳහා travel.state.gov/visas වෙත පිවිසෙන මෙන් වැඩිදුරටත් ඉල්ලා සිටියි.
]]>කැලණිය විශ්වවිද්‍යාලයේ පැවති දේශනයකට එක්වෙමින් මහ බැංකු අධිපතිවරයා මේ බව සඳහන් කළේය. ආර්ථිකය සුරක්ෂිත කිරීම වෙනුවෙන් මහ බැංකුව මේ වනවිටත් දැඩි තීරණ සහ ප්‍රතිපත්ති ක්‍රියාත්මක කර ඇති බව ඔහු පෙන්වා දුන්නේය.
එම ප්‍රතිපත්ති ඉදිරියේදී ද අවශ්‍යතාව අනුව ක්‍රියාත්මක කිරීමට පසුබට නොවන බව ද ඔහු පැවසීය. මහජන කැමැත්ත මත පමණක් පදනම්ව මෙවැනි තීරණ ක්‍රියාත්මක නොකිරීමෙන් අවසානයේ සමස්ත රටටම බරපතළ හානියක් සිදුවිය හැකි බව මහ බැංකු අධිපතිවරයා අවධාරණය කළේය.
රටේ අවශ්‍යතාව අනුව බදු ප්‍රමාණ ඉහළ නැංවීමට සිදුවන නමුත්, බහුතරයක් ජනතාව බදු වැඩි කිරීමට අකමැති බව ද ඔහු සඳහන් කළේය.
එවැනි තීරණ හේතුවෙන් සමාජය තුළ විරෝධතා මතුවී යම් අස්ථාවරත්වයක් නිර්මාණය වීමේ ඉඩකඩක් පවතින බව ද මහ බැංකු අධිපතිවරයා පෙන්වා දුන්නේය.
එබැවින් බදු අඩු කිරීම හෝ වැඩි කිරීම තුළින් රටේ ආර්ථිකයට සිදුවන බලපෑම පිළිබඳව මහජනතාවට නිවැරදිව සන්නිවේදනය කිරීම රජයේ වගකීමක් බව ඔහු පැවසීය.
ඒ හරහා ජනතාව දැනුවත් කර අදාළ ප්‍රතිපත්ති සාර්ථකව ඉදිරියට ගෙන යා හැකි බව ද ඔහු සඳහන් කළේය.
බදු සංශෝධන නිවැරදි අවස්ථාවේදී සිදුකිරීමේ වැදගත්කම ද මෙහිදී පෙන්වා දුන් මහ බැංකු අධිපතිවරයා, බදු වැඩි කරන සෑම අවස්ථාවකදීම ඊට අකමැති පිරිසක් සමාජයේ සිටින බව රජය තේරුම් ගත යුතු බව පැවසීය.
පසුගිය සමයේ රට තුළ පැවති දැඩි දේශපාලන හා ආර්ථික අර්බුද හමුවේ වුවද, රටේ ආර්ථිකය යම් මට්ටමකට හෝ ස්ථාවරව පවත්වා ගැනීමට හැකි වූයේ ජනප්‍රිය නොවන නමුත් රටට අත්‍යවශ්‍ය තීරණ නිසි අවස්ථාවේදී ක්‍රියාත්මක කිරීම නිසා බව ද මහ බැංකු අධිපතිවරයා වැඩිදුරටත් සඳහන් කළේය.
මෙම සමුළුව සඳහා ආසියා ශාන්තිකර කලාපීය විද්‍යුත් විකාශකයින්ගේ සංගමයට අයත් රටවල් 66ක විද්‍යුත් මාධ්‍ය ආයතන 225ක් නියෝජනය කරමින් නියෝජිතයෝ සහභාගි වූහ.
කලාපීය මාධ්‍ය ක්ෂේත්‍රයේ තාක්ෂණික දියුණුව, ක්‍රීඩා විකාශනය සහ මාධ්‍ය අන්තර්ගතයන් පිළිබඳ කරුණු මෙහිදී සාකච්ඡා කිරීමට නියමිතය.
එමෙන්ම කෘත්‍රිම බුද්ධිය (AI) මාධ්‍ය ක්ෂේත්‍රයට යොදා ගැනීම සහ සයිබර් ආරක්ෂාව ඇතුළු වත්මන් මාධ්‍ය ක්ෂේත්‍රයේ අභියෝග පිළිබඳව ද පුළුල් ලෙස අවධානය යොමු කෙරේ.
මහා සමුළුවට සමගාමීව තාක්ෂණික සහ විද්වත් කමිටු සැසි කිහිපයක් ද ඔක්තෝබර් 30 සහ 31 යන දිනවලදී පැවැත්විණි.
සමුළුවේ සමාරම්භක අවස්ථාවට සහභාගි වීම සනිටුහන් කරමින් ජනාධිපති අනුර කුමාර දිසානායක මහතා වෙත සමරු තිළිණයක් ද පිළිගන්වන ලදී.
මෙම අවස්ථාවට විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මහතා, විදේශීය තානාපතිවරුන්, රාජ්‍ය නිලධාරීන්, ආරක්ෂක අංශ ප්‍රධානීන් සහ මාධ්‍ය ක්ෂේත්‍රයේ නියෝජිතයෝ එක්ව සිටියහ.
බස්නාහිර, දකුණු, සබරගමුව, ඌව, උතුරු, නැගෙනහිර සහ මධ්‍යම යන පළාත්වල මෙම තත්ත්වය දක්නට ලැබෙන බව එම ඒකකයේ අධ්‍යක්ෂ වෛද්‍ය කපිල කන්නන්ගර මහතා සඳහන් කළේය.
ප්‍රාදේශීය ලේකම් කොට්ඨාස 130ක් පමණ තුළ මදුරු කීටයන්ගේ ඝනත්වය ඉහළ ගොස් ඇති බවත්, එමගින් රෝගය තවදුරටත් ව්‍යාප්ත වීමේ අවදානමක් මතුව ඇති බවත් ඔහු පැවසීය.
මේ හේතුවෙන්, නොවැම්බර් මස 9 වැනිදා සිට 14 වැනිදා දක්වා දිස්ත්‍රික්ක 13ක් ආවරණය වන පරිදි විශේෂ මදුරු මර්දන වැඩසටහන් ක්‍රියාත්මක කිරීමට නියමිතය.
මෙම වසරේ මේ දක්වා කාලය තුළ රට පුරා ඩෙංගු රෝගීන් 105,500ක් පමණ වාර්තා වී ඇති අතර, මරණ 79ක් ද වාර්තා වී තිබේ. ඩෙංගු රෝගය තවදුරටත් ව්‍යාප්ත වීම වැළැක්වීම සඳහා, තම නිවෙස් සහ සේවා ස්ථාන අවට ඇති මදුරුවන් බෝ විය හැකි ස්ථාන විනාශ කරමින් අවශ්‍ය පූර්වාරක්ෂක පියවර ගන්නා ලෙස වෛද්‍ය කන්නන්ගර මහතා මහජනතාවගෙන් ඉල්ලා සිටී.
]]>පසුගිය 2025 වසරේ එම කාලසීමාව තුළ ඉන්ධන ආනයනය සඳහා වැයවූ අමෙරිකානු ඩොලර් මිලියන 2,961.3 සමග සංසන්දනය කිරීමේදී මෙය 51.5%ක එනම් අමෙරිකානු ඩොලර් මිලියන 1,525.9ක පැහැදිලි වර්ධනයකි.
කෙසේවෙතත්, පසුගිය සැප්තැම්බර් මාසයේ ඉන්ධන ආනයන වියදම අමෙරිකානු ඩොලර් මිලියන 415.1ක් වූ අතර, එය 2025 සැප්තැම්බර් මාසයේ වැයවූ ඩොලර් මිලියන 440.7ට සාපේක්ෂව ඩොලර් මිලියන 25.6ක (-5.8%) සුළු අඩුවීමක් සටහන් කරයි.
මේ අතර මැදපෙරදිග ගැටුම්කාරී තත්ත්වය උග්‍ර වීමත්, හෝමුස් සමුද්‍ර සන්ධිය ඔස්සේ සිදුවන තෙල් ප්‍රවාහනයට එල්ල වූ සීමා කිරීම් නිසා ගෝලීය බොරතෙල් මිල, නැව් ගාස්තු සහ රක්ෂණ පිරිවැය ඉහළ යාමත් හේතුවෙන් දේශීය ඉන්ධන මිල ගණන් ඉහළ ගියේය.
මෙහි ප්‍රතිඵලයක් ලෙස ලංකා ඛනිජ තෙල් සංස්ථාවේ 2026 වසරේ පළමු මාස 06 තුළ ශුද්ධ විකුණුම් ආදායම 40.4%කින් ඉහළ ගොස් රුපියල් බිලියන 576.6ක් දක්වා වර්ධනය වී ඇති අතර, එය 2025 වසරේ පළමු මාස 06හි සටහන් වූයේ රුපියල් බිලියන 410.7ක් ලෙසය.
]]>ඒ අනුව රන් අවුන්සයක් රු. 1,318,214.00 ක් වේ.
රත්තරන් කැරට් 24 - ග්‍රෑම් 1 රු. 46,500.00 ක් වේ.
රත්තරන් කැරට් 24 - ග්‍රෑම් 8 (පවුම 1) රු. 372,000.00 ක් වේ.
රත්තරන් කැරට් 22 - ග්‍රෑම් 1 රු. 42,630.00 ක් වේ.
රත්තරන් කැරට් 22 - ග්‍රෑම් 8 (පවුම 1) රු. 341,000.00 ක් වේ.
රත්තරන් කැරට් 21 - ග්‍රෑම් 1 රු. 40,690.00 ක් වේ.
රත්තරන් කැරට් 21 - ග්‍රෑම් 8 (පවුම 1) රු. 325,500.00 ක් වේ.
කෙසේ වුවත් මෙම මිල ගණන් නිතර උච්චාවචනය වන බැවින් මිල දී ගැනීමට පෙර වෙළඳපොළ මිල ගණන් නැවත වතාවක් පරික්ෂා කිරීම සුදුසු වේ.
]]>රුපවාහිනි නලිකාවක් සමග සංවාදයකදි අදහස් දක්වමින් අමාත්‍යවරයා මේ බව පැහැදිලි කර ඇති අතර, යෝජිත පනත් කෙටුම්පත සම්බන්ධයෙන් සමාජය තුළ පැතිර යන වැරදි මත පිළිබඳවද කරුණු ඉදිරිපත් කර තිබේ.
මෙම පනත් කෙටුම්පත හඳුන්වාදීමේ ප්‍රධාන අරමුණ වන්නේ මත්ද්‍රව්‍ය ජාවාරම්, මුදල් විශුද්ධිකරණය සහ මිනිස් ජාවාරම් වැනි දේශසීමා ඉක්මවා ක්‍රියාත්මක වන සංවිධානාත්මක අපරාධ මැඩපැවැත්වීම බව අමාත්‍යවරයා සඳහන් කරයි.
එමෙන්ම එවැනි අපරාධ සම්බන්ධයෙන් විමර්ශන සිදුකිරීමේදී විදේශීය විමර්ශන අංශ සමඟ තොරතුරු හුවමාරු කරගැනීමද මෙම නීතිමය ක්‍රමවේදයේ අරමුණක් බව ඔහු පෙන්වා දී තිබේ.
යම් පුද්ගලයෙකු සංවිධානාත්මක අපරාධ කල්ලියක සාමාජිකයෙකුද යන්න තීරණය කිරීම සඳහා කරුණු 12ක් සලකා බලන බවද අමාත්‍යවරයා පැහැදිලි කර ඇත.
එහිදී පච්ච සලකුණු පිළිබඳව සලකා බලන්නේ ජපානය, සිංගප්පූරුව හෝ ඇමෙරිකාව වැනි රටවල හඳුනාගත් අපරාධ කණ්ඩායම්වල සාමාජිකයන් තම කල්ලියේ අනන්‍යතාව හෝ එහි තනතුර ප්‍රදර්ශනය කිරීම සඳහා භාවිත කරන විශේෂිත සලකුණු සම්බන්ධයෙන් පමණක් බව ඔහු සඳහන් කර තිබේ.
“දැන් ඒ සංවිධානාත්මක අපරාධ කල්ලියක සාමාජිකයෙක් වුණාම, එයා සංවිධානාත්මක අපරාධ කල්ලියක සාමාජිකයෙක්ද කියලා සලකා බැලිය යුතු කරුණු 12ක් තිබෙනවා. අද මම ඒ පනත ගෙනාවේ නැහැ. මට දොළහම ඔයාට කියන්න බැහැ. එතකොට ඒකේ කියන්නේ දොළහක් සලකා බලන්න පුළුවන්. ඒ කියන්නේ කල්ලියේ තියෙන Meeting වලට සහභාගි වෙලා තියෙනවද, සාමාජිකත්වයද කියලා බලන්න ඒකේ තියෙනවා. අර සමහර වෙලාවට අපි යෙදුව එකක් ටැටූ එක. දැන් ටැටූ කිව්වාම හැමෝම අර්ථකථනය කළේ කොහොමද? ආ,දැන් ‘අම්මා බුදු වේවා’ කියලා ගහගෙන යන්නත් බැහැ, ගහගෙන ගියොත් එහෙම අල්ලන් යනවා. වැරදි. ඒකේ වැදගත් කෑල්ලක් තියෙනවා. ‘හඳුනාගත් අපරාධ කණ්ඩායම්වල ප්‍රකට සාමාජිකයන්ගේ’ කියලා. Known Criminal Groups.”
ඒ අනුව සාමාන්‍ය පුද්ගලයෙකු තම කැමැත්ත අනුව ගසන පච්චයක් හේතුවෙන් මෙම පනත් කෙටුම්පත යටතේ අත්අඩංගුවට ගැනීමක් සිදු නොවන බව අමාත්‍යවරයා අවධාරණය කර ඇත.
“මම කියන්නේ හිතේ ගහාන්නෙයි කියන්න. මොකද, බැරි වෙලාවත් ඔය කියන එක නම් ඇත්තම නීතියේ තත්ත්වය, ඒ කියන්නේ ඕනෑම ටැටූ එකකට අල්ලන් යන්න පුළුවන් නම්, මගේ දුවයි පුතයිත් අල්ලන් යනවා පොලිසිය. හරිද? ඒක නිසා ඒක නම් ඉතා මිලේච්ඡ ලෙස බොරු කීමක් කළේ.”
තවද, යෝජිත පනත් කෙටුම්පත තුළ කොණ්ඩය දිගට වැවීම හෝ ඒ සම්බන්ධයෙන් කිසිදු සඳහනක් ඇතුළත් නොවන බවද හර්ෂණ නානායක්කාර මහතා වැඩිදුරටත් පැහැදිලි කර තිබේ. ඒ අනුව සාමාන්‍ය තරුණ පරපුර තමන්ගේ කැමැත්ත අනුව පච්ච ගැසීම හේතුවෙන් සිරගත වීමට සිදුවන බවට පැතිර යන ප්‍රචාර අසත්‍ය බව අමාත්‍යවරයාගේ පැහැදිලි කිරීමෙන් පෙන්වා දී ඇත.
අදාළ මුහුදු ප්‍රදේශවල සුළගේ වේගය ක්ෂණිකව ඉහළ යාමට ඉඩ ඇති බැවින් සහ මුහුදු තීරය ඉතා රළු වීමේ අවදානමක් පවතින බැවින්, එකී මුහුදු ප්‍රදේශවල නැවැත්වී සිටින හෝ යාත්‍රා කරන ධීවර සහ නාවික ප්‍රජාව මේ පිළිබඳව දැඩි අවධානයෙන් කටයුතු කරන ලෙසත්, උපදෙස් මාලාවන්ට අනුකූලව කටයුතු කරන ලෙසත් දෙපාර්තමේන්තුව වැඩිදුරටත් දැනුම් දෙයි.
]]>කම්කරු අමාත්‍යාංශය සඳහන් කළේ අදාළ ගිවිසුම් අත්සන් කිරීම දකුණු කොරියාවේදී සිදුකෙරෙන බවයි.
කම්කරු අමාත්‍යාංශය, ශ්රී ලංකා ජාතික වෘත්තීය සුරක්ෂිතතා හා සෞඛ්‍ය ආයතනය, කොරියානු ජනරජයේ ග්යොංසංනම්-ඩෝ පළාත, සචියොන් වාණිජ හා කර්මාන්ත මණ්ඩලය සහ චැංෂින් විශ්වවිද්‍යාලය අතර මෙම ගිවිසුම් අත්සන් කිරීමට නියමිතය.
ඒ සඳහා කම්කරු නියෝජ්‍ය අමාත්‍ය මහින්ද ජයසිංහ මහතා පසුගිය 30 වැනිදා දකුණු කොරියාව බලා පිටත්ව ගියේය.
ඔහු සමඟ කම්කරු අමාත්‍යාංශ ලේකම් එස්.එම්. පියතිස්ස සහ වෘත්තීය සුරක්ෂිතතා හා සෞඛ්‍ය ආයතනයේ අධ්‍යක්ෂ ජනරාල් දුමින්ද ජයලත් මහතා ඇතුළු පිරිසක්ද මෙම සංචාරයට එක්ව සිටිති.
මෙම ගිවිසුම් ක්‍රියාත්මක වීමත් සමඟ කම්කරු අමාත්‍යාංශය යටතේ පවතින ජාතික වෘත්තීය සුරක්ෂිතතා හා සෞඛ්‍ය ආයතනය මගින් තෝරාගනු ලබන ශ්රී ලාංකික සිසුන්ට දකුණු කොරියාවේ චැංෂින් විශ්වවිද්‍යාලයේ උසස් අධ්‍යාපනය ලැබීමට අවස්ථාව හිමිවනු ඇත.
එමෙන්ම අධ්‍යාපන කටයුතු අවසන් කිරීමෙන් පසු එම සිසුන්ට ග්යොංසංනම්-ඩෝ පළාතේ කර්මාන්ත ආයතනවල රැකියා අවස්ථා ලබාදීමටද අපේක්ෂා කෙරේ.
ඊට අමතරව එම පළාතේ දීර්ඝකාලීනව පදිංචිවීමේ අවස්ථාවද ලබාදීම මෙම වැඩසටහනේ අරමුණක් වී තිබේ. මෙම වෘත්තීය පුහුණු සහ ශිෂ්‍ය හුවමාරු වැඩසටහන් සඳහා අදාළ ගිවිසුම්වලට පසුගියදා කැබිනට් අනුමැතියද හිමිව තිබේ.
අදාළ වාර්තාව සකස් කිරීමේ අවසන් අදියර මේ වන විට සිදුවෙමින් පවතින බව පෙන්වා දුන් අමාත්‍යවරයා, එකී වාර්තාව අතුරුදන්ව ඇති බවට සමාජ මාධ්‍ය ඔස්සේ පැතිර යන ප්‍රචාරයන් සම්පූර්ණයෙන්ම අසත්‍ය බව ද අවධාරණය කළේය.
එහිදී වැඩිදුරටත් අදහස් දැක්වූ අධිකරණ අමාත්‍යවරයා සඳහන් කළේ කථානායකවරයා විසින් පත් කළ මෙම කමිටුව හරහා සාක්ෂිකරුවන් 16 දෙනෙකුගේ සාක්ෂි මෙහෙයවා ඇති අතර, ඊට අදාළ සියලුම ලේඛන පාර්ලිමේන්තුවේ සුරක්ෂිතව වාර්තාගත වී ඇති බවයි.
අසත්‍ය හා විකෘති තොරතුරු සමාජගත කිරීමෙන් වළකින ලෙස ද හෙතෙම මෙහිදී ඉල්ලා සිටියේය.
]]>'Gen Z regelt' නම් තරුණ සංවිධානය විසින් බර්ලින්, ෆ්‍රැන්ක්ෆර්ට් සහ මියුනිච් ඇතුළු ජර්මනියේ නගර 34ක මෙම විරෝධතා සංවිධානය කර තිබුණි.
අනිවාර්ය හමුදා සේවයට විරෝධය පළ කිරීම, අධ්‍යාපන ක්ෂේත්‍රයට වැඩි ආයෝජනයක් ලබාදීම සහ තරුණ පරපුර මුහුණ දෙන ඉහළ ජීවන වියදමට විසඳුම් ලබාගැනීම විරෝධතාකරුවන්ගේ ප්‍රධාන ඉල්ලීම් අතරට අයත් වේ.
යුරෝපය පුරා මේ වසරේ ව්‍යාප්ත වූ Gen Z තරුණ විරෝධතා රැල්ලේ තවත් දිගුවක් ලෙස මෙම විරෝධතා සැලකේ.
සර්බියාවේ ශිෂ්‍ය ක්‍රියාකාරීත්වය එරට දේශපාලන වෙනස්කම් සඳහා බලපෑ අතර, ප්‍රංශයේ පැවති විරෝධතා ඇතැම් අවස්ථාවල කොල්ලකෑම් සහ ප්‍රචණ්ඩ ක්‍රියා දක්වා වර්ධනය වී තිබුණි.
ජර්මනියේ ෆ්‍රැන්ක්ෆර්ට් නගරයේ පැවති විරෝධතා අතරතුර මුහුණු ආවරණය කරගත් පිරිස් වෙළෙඳසැල් කොල්ලකෑමට සහ දේපළවලට හානි කිරීමට කටයුතු කිරීමත් සමඟ තත්ත්වය ප්‍රචණ්ඩකාරී වී ඇත.
එහිදී වෙළෙඳසැල් දෙකක් පමණ කොල්ලකා ඇති අතර තවත් වෙළෙඳසැල් කිහිපයකට හානි සිදුව ඇති බව විදෙස් මාධ්‍ය වාර්තා කරයි.
එමෙන්ම හැම්බර්ග් නගරයේ ඇතැම් මාර්ග බාධකවලට ගිනි තබා ඇති අතර, පොලිසිය තත්ත්වය පාලනය කිරීමට උත්සාහ කරමින් සිටින බවද වාර්තා වේ.
මේ අතර, ඔක්තෝබර් 31 වැනිදා නිකුත් වූ නිල සංඛ්‍යාලේඛනවලට අනුව විරෝධතාවලට සහභාගී වූ පිරිස සංවිධායකයන් මුලින් අපේක්ෂා කළ 182,000ක සංඛ්‍යාවට වඩා අඩු වී තිබේ.
ෆ්‍රැන්ක්ෆර්ට්, මියුනිච් සහ බර්ලින් නගරවල පමණක් විරෝධතාකරුවන් 18,000ක් පමණ සහභාගී වූ බව පොලිසිය සඳහන් කර ඇත.
හැලොවීන් උත්සව පැවැත්වෙන කාලසීමාවට සමගාමීව පැවති මෙම විරෝධතා බොහෝ දුරට සාමකාමීව පැවති බව ජර්මානු බලධාරීන් ප්‍රකාශ කර තිබේ.
කෙසේ වෙතත්, අන්තවාදී කණ්ඩායම් මෙම විරෝධතා තම අරමුණු වෙනුවෙන් යොදාගැනීමට උත්සාහ කළ හැකි බවටද ඔවුන් අනතුරු අඟවා ඇත.
විරෝධතාවලට එක්වෙමින් 'Gen Z regelt' සංවිධානයේ ප්‍රකාශිකා ලීනා ෆ්‍රෙඩ්රික් බර්ලිනයේදී ප්‍රකාශ කර ඇත්තේ යුද්ධය සහ බලහත්කාරය වෙනුවට සාමය හා නිදහස වෙනුවෙන් තම සංවිධානය පෙනී සිටින බවයි.
සෞඛ්‍ය හා අධ්‍යාපන පද්ධති සඳහා වැඩි සහයෝගයක් ලබාදීම තම ප්‍රධාන ඉල්ලීම බවත්, අනිවාර්ය හමුදා සේවයට තමන් විරුද්ධ බවත් ඇය සඳහන් කර තිබේ.
එමෙන්ම සමාජයේ බර සාධාරණ ලෙස බෙදී යා යුතු බවද ඇය අවධාරණය කර ඇත.
ජර්මනියේ අභ්‍යන්තර කටයුතු අමාත්‍යාංශයට අනුව, එරට අන්තවාදී වාමාංශික කණ්ඩායම්වල ඇතැම් කොටස් සහ විදේශීය අන්තවාදී ව්‍යාපාර සමඟ සම්බන්ධ ඇතැම් කණ්ඩායම්ද මෙම විරෝධතාවලට සහයෝගය ලබාදීමට උත්සාහ කර තිබේ.
හෙසන් ප්‍රාන්තයේ අභ්‍යන්තර කටයුතු අමාත්‍ය රෝමන් පොසෙක් ප්‍රකාශ කර ඇත්තේ ප්‍රංශයේ සිදු වූ වෙළෙඳසැල් කොල්ලකෑම්, ගිනි තැබීම් සහ පොලිස් නිලධාරීන්ට පහරදීම් වැනි සිදුවීම් ජර්මනිය තුළ ආදර්ශයට නොගත යුතු බවයි.
යුරෝපයේ විශාලතම ආර්ථිකය හිමි ජර්මනිය මේ වන විට ආර්ථික වර්ධනය යළි ඇති කරගැනීමේ අභියෝගයකට මුහුණ දෙමින් සිටී.
එමෙන්ම වැඩකරන වයසේ ජනගහනය අඩුවීම හේතුවෙන් විශ්‍රාම වැටුප් සහ රාජ්‍ය සේවා පද්ධති කෙරෙහිද වැඩි පීඩනයක් එල්ල වී තිබේ.
කෙසේ වෙතත්, මෙම විරෝධතා ව්‍යාපාරය සැබෑ ලෙසම තරුණ පරපුර විසින් මෙහෙයවනු ලබන්නේද යන්න පිළිබඳවද ප්‍රශ්න මතුව තිබේ.
විවිධ දේශපාලන සහ සිවිල් සමාජ කණ්ඩායම් ඊට සම්බන්ධ වී සිටීම ඊට හේතුවයි. ජර්මනියේ ජාතික පාසල් ශිෂ්‍ය සංවිධානය වන BSK මෙම විරෝධතා ව්‍යාපාරයෙන් ඈත්ව සිටින බව ප්‍රකාශ කර ඇති අතර, නොවැම්බර් 20 වැනිදා වෙනම විරෝධතා දිනයක් පැවැත්වීමටද සැලසුම් කර තිබේ.
එම ආපදා තත්ත්වය හේතුවෙන් මේ වන විට පුද්ගල මරණ 06ක් සහ තුවාල ලැබූවන් 08 දෙනෙකු වාර්තා වී ඇති අතර, පුද්ගලයින් තිදෙනෙකු අතුරුදන්ව තිබේ.
මීට අමතරව පූර්ණ නිවාස හානි 08ක් සහ අර්ධ නිවාස හානි 737ක් ද වාර්තා වී ඇත. අයහපත් කාලගුණයෙන් වැඩිම බලපෑම එල්ල වී ඇත්තේ රත්නපුර දිස්ත්‍රික්කයට වන අතර, එහි ප්‍රාදේශීය ලේකම් කොට්ඨාස 15ක පවුල් 2,666කට අයත් පුද්ගලයින් 10,051 දෙනෙකු පීඩාවට පත්ව ඇත.
දෙවැනියට වැඩිම බලපෑමක් වාර්තා වන්නේ පුත්තලම දිස්ත්‍රික්කයෙන් වන අතර, එහි ප්‍රාදේශීය ලේකම් කොට්ඨාස 11ක පවුල් 1,850කට අයත් පුද්ගලයින් 6,900 දෙනෙකු බලපෑමට ලක්ව ඇති බව ආපදා කළමනාකරණ මධ්‍යස්ථානය වැඩිදුරටත් සඳහන් කරයි.
]]>2024 වසරේදී එවකට පැවති රජය ගත් ප්‍රතිපත්තිමය තීරණයකට අනුව, මෙරට වයස අවුරුදු 18ට වැඩි සියලු පුද්ගලයන් TIN අංකයක් ලබාගත යුතු බවට නියම කර තිබේ.
ඒ අනුව, TIN අංකය ලබාගැනීම සඳහා දේශීය ආදායම් දෙපාර්තමේන්තුව වෙත පැමිණීමට හෝ මාර්ගගත ක්‍රමවේදය ඔස්සේ අයදුම් කිරීමට ජනතාවට අවස්ථාව සලසා දී ඇත.
හෙට සිට TIN අංකය ඉදිරිපත් කිරීම අනිවාර්ය වන කාර්යයන් අතර බැංකුවක හෝ මූල්‍ය ආයතනයක නව ගිණුමක් විවෘත කිරීම, ණය පතක් ලබාගැනීම, ගොඩනැගිලි සැලැස්මකට අනුමැතිය ලබාගැනීම සහ මෝටර් වාහනයක් ලියාපදිංචි කිරීම ඇතුළත් වේ.
එමෙන්ම මෝටර් වාහන බලපත්‍රයක් අලුත් කිරීම, ඉඩමක් හෝ ඉඩමක හිමිකම ලියාපදිංචි කිරීම, ව්‍යාපාරයක් ලියාපදිංචි කිරීම සහ ශ්රී ලංකාවේ සංස්ථාපිත සමාගමක කොටස් පැවරීමේදී ද TIN අංකය ඉදිරිපත් කළ යුතුය.
කෙසේ වෙතත්, සියලුම බැංකු ගනුදෙනු සඳහා TIN අංකය අනිවාර්ය කර නොමැති බව දේශීය ආදායම් දෙපාර්තමේන්තුව අවධාරණය කරයි.
ඒ අනුව බැංකු ගනුදෙනුවලදී TIN අංකය අවශ්‍ය වන්නේ නව ගිණුමක් විවෘත කිරීමේදී සහ ණය පතක් ලබාගැනීමේදී පමණක් බව එම දෙපාර්තමේන්තුවේ මාධ්‍ය ප්‍රකාශක නන්දන කුමාර මහතා සඳහන් කරයි.
එමෙන්ම මෙම කාර්යයන් සඳහා TIN සහතිකයම ඉදිරිපත් කිරීම අත්‍යවශ්‍ය නොවන බව ද ඔහු පෙන්වා දෙයි.
ජාතික හැඳුනුම්පත් අංකය ඇතුළත් කර සිදුකරන පරීක්ෂාවෙන් ලැබෙන තොරතුරු අදාළ ආයතනය වෙත ඉදිරිපත් කිරීම ප්‍රමාණවත් වන බව ඔහු වැඩිදුරටත් සඳහන් කරයි.
වයස අවුරුදු 18 ඉක්මවූ සියලු දෙනා TIN අංකයක් ලබාගත යුතු වුවද, එම සියලු දෙනාම බදු ගෙවිය යුතු බවට පැතිර යන වාර්තා අසත්‍ය බව දේශීය ආදායම් දෙපාර්තමේන්තුව පවසයි.
පුද්ගලයෙකුගේ වාර්ෂික ආදායම රුපියල් ලක්ෂ 12 ඉක්මවන්නේ නම් පමණක් ඔහු හෝ ඇය බදු ගෙවීමට යටත් වන බව එම දෙපාර්තමේන්තුව සඳහන් කරයි.
දේශීය ආදායම් දෙපාර්තමේන්තුවේ නිවේදනවලට අනුව, වයස අවුරුදු 18 සම්පූර්ණ වූ මෙරට පුරවැසියන් මිලියන 17ක පමණ පිරිසක් සිටින අතර, ඉන් මිලියන 3ක පමණ පිරිසක් මේ වන විට TIN අංකය ලබාගෙන තිබේ.
තලෙයිමන්නාරමට උතුරින් පිහිටි මෙරට මුහුදු සීමාවට අනවසරයෙන් ඇතුළු වී ඉන්දීය ධීවර යාත්‍රා රාශියක් මසුන් ඇල්ලීමේ නිරත වන බව උතුරු මැද නාවික විධානය නිරීක්ෂණය කිරීමෙන් අනතුරුව සිදුකළ විශේෂ මෙහෙයුමකදී මෙම අත්අඩංගුවට ගැනීම සිදුකර ඇත.
නාවික හමුදා භාරයට ගත් ඉන්දීය ධීවර යාත්‍රාව සහ ධීවරයින් පිරිස තලෙයිමන්නාරම ජැටිය වෙත රැගෙන ඒමට කටයුතු කර ඇති අතර, ඉදිරි නීතිමය කටයුතු සඳහා ඔවුන් මන්නාරම ධීවර හා ජලජ සම්පත් දෙපාර්තමේන්තු කාර්යාලය වෙත භාරදීමට නියමිතය.
]]>ඊයේ (31) ලාහෝර්හි ගඩාෆි ක්‍රීඩාංගණයේ පැවැති මෙම දිවා රාත්‍රී තරගයේදී ශ්රී ලංකාව ලබාදුන් ලකුණු 326ක ඉලක්කය පන්දුවාර 48යි පන්දු 3කදී කඩුලු 7ක් දැවී පසුකර යාමට පාකිස්තානය සමත් විය.
මෙම තරගයේදී ශ්රී ලංකා කණ්ඩායමට ලකුණු 340ත් 350ත් අතර ඉලක්කයක් කරා යාමේ අවස්ථාවක් පැවතියද අවසන් පන්දුවාර කිහිපයේදී කඩුලු වේගයෙන් බිඳ වැටීම හේතුවෙන් එම අවස්ථාව අහිමි විය.
එමෙන්ම පාකිස්තාන ඉනිමේදී ෆකාර් සමාන් දවාගැනීමට තිබූ උඩපන්දු අවස්ථා කිහිපයක් අත්හැරීමද ශ්රී ලංකාවට දැඩි අවාසියක් විය.
පාකිස්තානය වෙනුවෙන් විශිෂ්ට පිතිහරඹයක නිරත වූ ෆකාර් සමාන් පන්දු 99කදී ලකුණු 127ක් රැස් කළේ හතරේ පහර 11ක් සහ හයේ පහර 6ක් සමඟිනි.
ඔහුට අනගි සහායක් ලබාදුන් සාද් බේග් ලකුණු 74ක් රැස් කළේය.
ෆකාර් සමාන් ලකුණු 69ක් සහ ලකුණු 106ක් ලබා සිටියදී උඩපන්දු අවස්ථා දෙකක් අත්හැරී තිබීම විශේෂත්වයකි.
එම අවස්ථාවලදී ඔහු දවාගැනීමට ශ්රී ලංකාව සමත් වූයේ නම් තරගයේ ප්‍රතිඵලය වෙනස් වීමටද ඉඩ තිබිණි.
කෙසේ වෙතත්, එම අවස්ථාවලින් ප්‍රයෝජන ගත් ෆකාර් සමාන් පාකිස්තානය ජයග්‍රහණය කරා ගෙන යාමට විශාල දායකත්වයක් ලබාදුන්නේය. තරගයේ අවසන් භාගයේදී වේගවත් පිතිහරඹයක නිරත වූ අරෆත් මිනාස් පන්දු 31කින් ලකුණු 61ක් රැස් කළේය.
ඔහු සහ හසන් නවාස් අතර හයවැනි කඩුල්ල වෙනුවෙන් ගොඩනැඟුණු ලකුණු 94ක සම්බන්ධතාව පාකිස්තානයේ ජයග්‍රහණයට තීරණාත්මක විය.
හසන් නවාස් නොදැවී ලකුණු 37ක් ලබාගත්තේය. ශ්රී ලංකාව වෙනුවෙන් පන්දුවෙන් සාර්ථක වූ දිල්ෂාන් මධුශංක කඩුලු 3ක් දවාගත් අතර අසිත ප්‍රනාන්දු කඩුලු 2ක් බිඳහෙළීය.
කමිඳුගෙන් විශිෂ්ට ශතකයක් තරගයේ පළමුව පන්දුවට පහරදුන් ශ්රී ලංකා කණ්ඩායම නියමිත පන්දුවාර 50 අවසානයේ කඩුලු 8ක් දැවී ලකුණු 325ක් රැස් කළේය.
ශ්රී ලංකා ඉනිමේ කැපී පෙනෙන පිතිහරඹයක නිරත වූ කමිඳු මෙන්ඩිස් පන්දු 128කදී ලකුණු 131ක් රැස් කළේ හතරේ පහර 12ක් සහ හයේ පහර 2ක් සමඟිනි.
ඔහුට අනගි සහායක් ලබාදුන් පවන් රත්නායක පන්දු 65කදී ලකුණු 77ක් රැස් කළේය. අවිශ්ක ප්‍රනාන්දු ලකුණු 38ක් ලබාගත් අතර නායක කුසල් මෙන්ඩිස්ට රැස්කරගත හැකි වූයේ ලකුණු 8ක් පමණි.
පන්දුවාර 40ක් අවසානයේ කඩුලු 2ක් පමණක් දැවී ලකුණු 238ක් ලබා සිටි ශ්රී ලංකා කණ්ඩායමට අවසන් පන්දුවාර 10 තුළ ලකුණු 87ක් එක්කර ගැනීමට හැකි වුවද එම කාලය තුළ කඩුලු 6ක් දැවී ගියේය.
විශේෂයෙන් කමිඳු මෙන්ඩිස් සහ පවන් රත්නායක දැවී යාමෙන් පසුව ශ්රී ලංකා ඉනිමේ අවසන් අදියරේදී තවත් විශාල ලකුණු සංඛ්‍යාවක් රැස්කර ගැනීමේ අවස්ථාව අහිමි විය.
පාකිස්තානය වෙනුවෙන් ශහීන් ෂා අෆ්රිඩි, නසීම් ෂා සහ හැරිස් රවුෆ් කඩුලු 2 බැගින් දවාගත්හ.
පිනි සහිත තත්ත්වයත් ශ්රී ලංකාවට අවාසි වෙයි මෙම තරගය දිවා රාත්‍රී තරගයක් වූ බැවින් දෙවැනි ඉනිමේදී ඇති වූ පිනි සහිත තත්ත්වයද ශ්රී ලංකා පන්දු යවන්නන්ට අභියෝගයක් වී තිබිණි.
එම තත්ත්වය හේතුවෙන් පන්දුව පාලනය කිරීමේදී පන්දු යවන්නන්ට අපහසුතා ඇති වූ බවද වාර්තා වේ.
තරගයෙන් පසුව අදහස් දක්වමින් ශ්රී ලංකා නායක කුසල් මෙන්ඩිස් සඳහන් කර තිබුණේ තම කණ්ඩායම ලකුණු 25ත් 30ත් අතර ප්‍රමාණයකින් අඩුවෙන් ලබාගත් බවයි.
එමෙන්ම පන්දු රැකීමේදී සිදු වූ අත්වැරදීම් පිළිබඳවද අවධානය යොමු කළ යුතු බව ඔහු පෙන්වා දී තිබිණි.
ඒ අනුව ශ්රී ලංකාවට මෙම තරගයේදී පරාජය අත්කර දීමට අවසන් පන්දුවාරවල කඩුලු බිඳවැටීම, ෆකාර් සමාන් දවාගැනීමට තිබූ උඩපන්දු අවස්ථා අහිමි වීම සහ පන්දු යැවීමේදී ඇති වූ අපහසුතා ඇතුළු කරුණු කිහිපයක් බලපා තිබේ.
මේ අතර, තරගයේ වීරයා ලෙස ෆකාර් සමාන් නම් කෙරුණු අතර තරගාවලියේ වීරයා සම්මානය හිමි වූයේ ලකුණු 149ක් සහ කඩුලු 9ක් දවාගත් අරෆත් මිනාස්ටය.
ඒ අනුව 2026/27 පාකිස්තාන එක්දින තුන්කොන් තරගාවලියේ ශූරතාව දිනා ගැනීමට පාකිස්තානය සමත් වූ අතර ශ්රී ලංකාවට අනුශූරතාවයෙන් සෑහීමට පත්වීමට සිදුවිය.
]]>