'දිට්වා' කුණාටුව ඉන්දියාවේ තමිල්නාඩු වෙරළට ලඟා වෙයි- ලංකාවේ මරණ 159කට ඉහළින්

'දිට්වා' සුළිකුණාටුව යාපනය සිට 80 km ක් ඊසාන දෙසින්, අක්ෂාංශ 9.9°N සහ දේශාංශ 80.7°E ආසන්නයේ කේන්ද්‍රගතව වී ඇත.

මෙම පද්ධතිය උතුරට බරව වයඹ දෙසට ගමන් කරනු ඇත.  

මෙම පද්ධතිය නොවැම්බර් මස 30 වන විට ඉන්දියාවේ තමිල්නාඩු වෙරළ තීරයට ලඟා වනු ඇතැයි අපේක්ෂා කෙරේ. කාලගුණ විද්‍යා දෙපාර්තමේන්තුව මගින් මේ සම්බන්ධව නිකුත් කරන ඉදිරි නිවේදන පිලිබඳ අවධානය යොමුකරන ලෙස ඉල්ලා සිටිනු ලැබේ.

ආපදාවට ලක්වූ කාන්තා සහ ළමයින් ගැන දැනුම්දීමට නොමිලේ හොට්ලයින් දෙකක්

පවතින වැසි සහිත කාලගුණ තත්ත්වයේ සැලකිය යුතු අඩුවීමක් හෙට (30) සිට අපේක්ෂා කෙරේ. උතුරු, උතුරු-මැද, මධ්‍යම සහ වයඹ පළාත්වල නිරන්තර වැසි හෝ ගිගුරුම් සහිත වැසි ඇතිවේ. ඇතැම් ස්ථානවලට මි.මී. 100 ට වැඩි තද වැසි ඇති විය හැක. 

සබරගමුව සහ බස්නාහිර පළාත් සහ ගාල්ල සහ මාතර දිස්ත්‍රික්කවල විටින් විට වැසි හෝ ගිගුරුම් සහිත වැසි ඇතිවේ. සබරගමුව සහ බස්නාහිර පළාත්වල ඇතැම් ස්ථානවලට මි.මී. 50 ට වැඩි තරමක තද වැසි ඇති විය හැක. දිවයිනේ සෙසු ප්‍රදේශවල තැනින් තැන වැසි හෝ ගිගුරුම් සහිත වැසි ඇතිවේ.

විපතට පත් ජනතාවට උපකාර කිරීම සඳහා නිකුත් කළ බැංකු ගිණුම් අංක ටික මෙන්න

දිවයිනේ බොහෝ ප්‍රදේශවල හමන පැ.කි.මී. (60-70) දක්වා වන ඉතා තද සුළං සමඟ විටින් විට හමන පැ.කි.මී. (80-90) දක්වා වන ප්‍රහාරාත්මක සුළං ඇතිවිය හැක. තද වැසි සහ තද සුළං මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් කාරුණිකව ඉල්ලා සිටිනු ලැබේ.  

අයහපත් කාලගුණික තත්ත්වය හේතුවෙන් මේ දක්වා සිදු වූ මරණ ගණන 159ක් දක්වා ඉහළ ගොස් තිබේ. එමෙන්ම පුද්ගලයින් 203දෙනෙකු මේ වනවිටත් අතුරුදන් වී ඇති බව ආපදා කළමනාකරණ මධ්‍යස්ථානය පැවසීය. එම මධ්‍යස්ථානය අද (29) රාත්‍රී 8.00ට නිකුත් කළ නිවේදනයේ මේ බව සඳහන්ව ඇත.

මේ වනවිට දිස්ත්‍රික්ක 25කට අයත් පවුල් 234,503ක පුද්ගලයින් 833,985 දෙනෙකු ආපදාවට ලක්ව තිබේ. එමෙන්ම පවුල් 34,19කට අදාළව පුද්ගලයින් 122,822 දෙනෙකු මේ වනවිට ආරක්ෂිත ස්ථාන 919ක රැඳී සිටී.

ආපදා තොරතුරු දීමට පොලීසියෙන් විශේෂ මෙහෙයුම් මැදිරියක්